Publikimi i draft-raportit të Komisionit të Venecias, një autoritet prestigjoz juridik e konsitucional, i cili e quan shkelje kushtetuese aktin e presidentit Meta për anullimin e 30 Qershorit, gjë që në terma politikë është goditja më e rëndë për kreun e shtetit ardhur nga jashtë, ka sjellë vetëm copëza reagimesh nga Presidenca, e këto me gjuhën zëdhënësit Tedi Blushi.
Vetë kreu i shtetit nuk ka reaguar, por gjuha e shpenguar e tij, karakteristike e kohëve të fundit qyshse hyri si aktor opozitar në krizën politike, është reflektuar te ajo e zëdhënësit, një ish-gazetar, gjithsesi pa ndonjë peshë publike, duke ushtruar për vite reporterin klasik të politikës.
“ZERO SHKELJE TË KUSHTETUTËS!
HARROJINI TRAKTET e porositura ngado që të vijnë!
E dinë të gjithë shqiptarët dhe ndërkombëtarët me integritet se Presidenti i Republikës ka MBROJTUR Kushtetutën, rendin demokratik dhe pluralizmin politik, dhe ka SHMANGUR gjakderdhjen dhe Rajshtagun!
DËGJONI Bundestagun!
ULUNI URGJENT dhe ZGJIDHNI krizën e rëndë politike para se t’i shtoni kushte të tjera Shqipërisë!”, ishte reagimi i parë i Blushit, ku siç mund të vihet re, tenton ta delegjitimojë me lojra fjalësh verdiktit të ardhur Venecia.
Rreth një orë më pas ai do postonte një tjetër reagim, kësaj here duke e vendosur veten në rolin e një autoriteti, teksa deklaron në vetën e parë: “qëndrimi im i mëparshëm është shumë i qartë…”, kjo duke iu referuar aktit të presidentit.
“Nuk komentojmë asnjë dokument të klasifikuar që na vjen nga institucione të ndryshme, përfshi edhe Komisionin e Venecias.
Aq më tepër që sot është data 27 shtator 2019, ndërsa ky dokument mban datën 29 shtator 2019.
Jemi të paqartë: është “ngatërresë” nga nxitimi, apo në datën 29 shtator 2019 do vijë një dokument tjetër?
Sa i takon çështjes në fjalë, qëndrimi im i mëparshëm është shumë i qartë:
ZERO SHKELJE TË KUSHTETUTËS!”, shkruan Blushi, që siç dallohet, kapet te detaji i datës, për të përfunduar te vetëshpallja si autoritet në fushën juridike.
E pas tyre, ka ardhur një status tjetër, jo në këtë frymë, gjithsesi zyrtare, por krejt jashtë zyrtare, duke kaluar caqet e çdo etike, pasi është futur në jetën private të një kritiku mediatik të Metës, gazetarit Sokol Balla.
“Kol Sallakja që i kërkonte Metës ta ndihmonte për t’i futur gruan në burg për korrupsion, tani i bën thirrje për burrni! Të keqen e Tao-Spiropalit!”, shkruan zëdhënësi i Metës, duke bërë një diversion të rëndë nga pikëpamja etike, e kjo fill pas një shkrimi të Ballës ku i kërkon Metës që të japë dorëheqjen. /tesheshi.com/
