Nga Blendi Gashi
Një fërkim në distancë u konsumua së fundi mes kryeministrit Isa Mustafa dhe liderit të AAK-së, Ramush Haradinaj, të cilët shfrytëzuan hapësirat virtuale të FB për t`u gëricur me shoqi-shoqin.
Por cilat janë ndër vite përplasjet e Haradinajt në politikë?
Kujt ia bërë borxh, apo kush ia bërë borxh?
Janë tre persona që Ramushi assesi nuk mund t’i “durojë”: kryeministrin Isa Mustafa, kryetarin e grupit parlamentar të PDK-së, Adem Grabovci dhe kryetarin e Komisionit Shtetëror për Demarkacion me Malin e Zi, Murat Meha.
Me dy të parët Haradinaj është përplasur kohëve të fundit, kurse me Grabovcin vite më parë.
Por duhet veccuar se me kryeministrin Isa Mustafa, Haradinaj pati raporte të mira vitin e kaluar, gjatë kohës së bllokut opozitar VLAN, që u ndërtua kundër Thaçit.
Ramushi – Isa, dikur ‘miq’, tani ‘armiq’
Kreu i AAK-së nuk po e përpin lehtë ‘tradhëtinë’ që Mustafa ia bëri viti e kaluar gjatë kohës së VLAN-it.
Ramushi dhe Isa, së fundmi kanë zhvilluar një fushatë të ashpër mes vete, jo ‘sy më sy’, si burrat, por përmes Facebookut.
Haradinaj duke u ndërlidhur me gazin lotësjellës në Kuvend ka thënë se nëse pushteti insiston të arrestojë deputetët, populli do ta arrestojë Isa Mustafën.
“Lëre Facebookun e kthjellu kryeministër”, ishte një nga porositë e Haradinajt për Mustafën. Ky i fundit, duke aluduar në takimet që kishin gjatë kohës së VLAN me Haradinajn, Limajn e Kurtin, ka deklaruar se opozita ishte në gjendje të ofronte gjithçka vetëm e vetëm për të qenë në pushtet.
Presidenti historik Ibrahim Rugova ka vite që ka vdekur por përkundër kësaj, partitë politike shpeshherë janë kapur për të, duke mos e lënë rehat as në varr.
Në një postim në Facebook, Mustafa shkruajti: “Njerëzit e LDK -së i kanë vra e i kanë kërcënuar por kurrë nuk janë dorëzuar. E kanë kërcënuar edhe Ibrahim Rugovën, janë likuiduar shumë veprimtarë të LDK-së por fryma shtetendërtuese nuk është ndalë. Nuk do ta ndalni as ju!”.
Por i menjëhershëm ka qenë reagimi i Haradinajt, duke thënë se nëse Mustafa e ka ndërlidhur vrasjen e disa aktivistëve të LDK-së me emrin e tij, kjo tregon burracakërinë e tij. “Ia kujtoi Isa Mustafës se kur unë kam pasur marrëveshje burrash me presidentin Rugova, ai ka qenë si hijenë kundër tij, sikundër që është edhe sot, thellësisht kundër frymës së Ibrahim Rugovës, i cili as në atë dynja nuk do t’i kishte falur Bjeshkët e Rugovës! Lëre Facebookun e kthjellu kryeministër, sepse edhe aty e mbyte shqipen!”
‘Kapja’ e Haradinajt me Murat Mehën
Si anëtar i Komisionit për Punë të Jashtme, Ramush Haradinaj është përplasur fortë edhe me kryetarin e Komisionit Shtetëror për Demarkacion me Malin e Zi, Murat Meha. Ky i fundit është personi ndoshta që më së shumti urren lideri i AAK-së.
Aq shumë ishte nervozuar në një takim që kishte përballë Mehën sa ia kishte përplasur në fytyrë hartën. Ngjarja ka ndodhur teksa Komisioni për Politikë të Jashtme po diskutonte për Demarkacionin me Malin e Zi.
Haradinaj – Grabovci, përplasja që do të mbahet mend gjatë
Si lideri më i fortë opozitar në vitin 2009, Haradinaj ishte përplasur keq me Adem Grabovcin që atë kohë ishte numri 2 i Ministrisë së Transportit dhe Post Telekomunikacionit. 
Gazetarët u lodhën aq shumë pasi disa konferenca të njëpasnjëshme u thirrën nga të dyja palët brenda një dite, ku shkëmbeheshin akuza e kundërakuza.
Haradinaj e quajti Grabovcin, arkëtar të SHIK-ut. “Adem Grabovci është i ngarkuar nga qeveria për t’i paguar këto grupe për t’i krijuar epërsi PDK-së dhe për t’i shkaktuar dëme partive tjera politike në vend”.
I menjëhershëm ishte reagimi i zv. minisrit të MTPT-së, Grabovci, i cili e quajti shpifje deklaratat e liderit të AAK-së, të cilin e kishte ftuar për një debat publik.
Në fund, gjithçka ishte mbyllur në akuzat e ndërsjella mes tyre dhe sigurisht debate televiziv nuk kishte ndodhur. /tesheshi.com/
