Raportohet për të paktën 80 persona që kanë humbur jetën dhe mbi 1300 të tjerë rezultojnë të zhdukur në Gjermani, si pasojë e përmbytjeve katastrofike që kanë përfshirë vendin. Por për një familje shqiptare jeta ka rinisur përsëdyti.
Bild rrëfen historinë e Sheik Hysenit, 46 vjeç, një shqiptar nga Kosova që jeton në Gjermani, i cili me orë të tëra nuk e dinte nëse i kishte humbur vajzat e tij, Lauretën 13 vjeçe dhe Altunën 17 vjeçe.
“Të mërkurën vajzat e mia më thirrën, më thanë se uji kishte arritur deri në katin e parë, vrapova për të shkuar në shtëpi, por kur mbërrita uji tashmë ishte kudo. Hera e fundit që fola me to ishte ora 21:00, më pas lidhja u shkëput”, ka thënë ai për Bild.
Krejt i dëshpëruar, ai tha se priti gjithë natën në një urë nga e cila mund të shihte shtëpinë e tij, por fatmirësisht, pasditen e djeshme atij iu dha lajmi se dy vajzat ishin shpëtuar me helikopter.
“Ne vetëm kemi qarë, kisha frikë për vajzat e mia, jam shumë i lumtur që u shpëtuan. Tani duhet të shohim se çarë ka mbetur nga shtëpia”, ka thënë ai. /tesheshi.com/
