Pas sulmeve të fundit, Franca dhe qytetarët e saj janë në shok. Ambasadorja e Francës u shpreh se prej sulmeve terroriste, të cilat presidenti i Francës Francois Hollande i karakterizoi si një akt i vërtetë lufte, është prekur e gjithë Evropa.
“Të gjithë pyesim se për ç’arsye të vriten njerëz të pafajshëm dhe të mbahet një barrë aq e madhe. Kapja pas jetëve të njerëzve të pafajshëm është diçka e pakuptueshme dhe e papranueshme”, tha ambasadorja, Lorens Oer për emisionin “10 minuta”.
E pyetur nëse kjo ngjarje a paraqet lëshim të shërbimeve policore dhe të sigurisë, ambasadorja Oer thotë se nuk bëhet fjalë për lëshime, por për një sulm klasik terrorist, që ndodh kur nuk pret askush.
“Këto sulme ndodhin kur më së paku priten. Këtu s’kemi të bëjmë me lëshime nga ana e policisë. Në kontekst të kësaj, do të shtoja se para ca ditësh, në Tulon u zbulua dhe u parandalua një sulm i ngjashëm, kur një djalosh i ri me arsenal të madh armësh në brez, u pengua ta kryejë sulmin”, shprehet Oer.
Franca i ka përforcuar kontrollet dhe i ka shtuar masat e sigurisë dhe të kontrolleve të kufijve. Mirëpo, ata nuk janë mbyllur në kuptimin e plotë të fjalës dhe se Franca po përgatitet ta organizojë Samitin e Kombeve të Bashkuara për ndryshimet klimatike në Paris, të planifikuar më 30 nëntor.
Ndryshe situata në Paris ka reflektuar frikën dhe shuar shpresën edhe të refugjatëve sirianë në vendkalimin kufitar të Tabanocit, meqë sipas tyre pikërisht Parisi ka qenë destinacioni i fundit. Refugjatët e pyetur nga Radio Evropa e Lirë thonë se janë të frikësuar pasi mendojnë se situata tani do të jetë shumë më e vështirë për ta. Druajnë për sigurinë e tyre.
“Mendoj se është shumë keq meqë jemi refugjatë dhe meqë kërkojmë jetë më të mirë. Kjo mund të krijojë probleme për ne. Duhet doemos të them se ajo që ndodhi në Paris është shumë keq. Tani kemi shumë frikë”, tha një refugjat.
“Mbërrita tani në Serbi dhe dëgjova për sulmin në Paris, mendoj se këto janë lajme shumë të këqija, dua të shkoj në Paris dhe të kem jetë të mirë dhe tani jemi shumë të frikësuar”, u shpreh një tjetër refugjatë./tesheshi.com/
