Rally de la Coruna, një garë me makina në veriperëndim të vendit, në Galici, pati një fund të keq, teksa një prej makinave garuese doli nga rruga dhe u përplas me një turmë njerëzish, duke lënë gjashtë të vdekur e gjashtëmbëdhjetë të plagosur.
Aksidenti ndodhi mbrëmjen e së shtunës, dhe gara u pezullua menjëherë. Dëshmitarët treguan se si makina që po garonte, një Peugeot 206, u përpoq ta merrte një kthesë me shpejtësi më të lartë nga ç’duhej, e për pasojë doli nga rruga dhe u përplas me turmën e njerëzve.
Dy drejtuesit e makinës, Sergio Tabeayo Sande dhe Luis Miguel Prego, nuk raportohet të jenë lënduar.
Mes gjashtë personave që humbën jetën menjëherë besohet të jenë dy gra shtatzëna dhe një fëmijë tetë vjeç.
Garat e tilla, që zhvillohen në rrugët e ngushta të lokaliteteve, bëhen shpesh shkak për aksidente të përmasave të tilla. Në shumë prej tyre mungojnë barrierat mbrojtëse, duke bërë që mundësia e përplasjes së makinave të garave me shikuesit të jetë mjaft e madhe. /tesheshi.com/
