Për të dytin sezon radhazi, ëndrra për të fituar kampionatin anglez është venitur në fund për Totenhemin, që gabon sërish në momentet finale.
Totenhemi do të arrinte fitoren e dhjetë rresht në Premier League nëse do të fitonte në derbin londinez ndaj Uest Hemit. Një fitore që do ta ngushtonte minimalisht diferencën në pikë me Çelsin kryesues, për të shpresuar në një gabim më tej të skuadrës së Conte-s.
Në vend të kësaj, Totenhemi ka humbur 1-0 me Uest Hemin, duke e kthyer në një mision të pamundur marrjen e trofeut.
Ndërsa kishte fituar të dielën e shkuar me Arsenalin, Totenhemi do ta pësonte ndaj Uest Hemit nga një gol i Lanzini-t në minutën e 65-të, edhe pse do ta zotëronte plotësisht lojën.
Tekniku i Totenhemit, Mauricio Pochettino, e pranon se do të jetë e vështirë të kapet Çelsi, por për të mbajtur lart moralin e lojtarëve të tij deklaron se gara për titull nuk ka mbaruar ende.
Totenhemi mbetet në kuotën e 77 pikëve, përkundër 81 pikëve të Çelsit kryesues, që ka një ndeshje më pak të luajtur dhe që i mjaftojnë dy fitore në takimet e ardhshme për t’u shpallur kampion. /tesheshi.com/
