Dështimi në objektivat e deri para një jave është reflektuar në lojën dhe në rezultatin e dy prej ekipeve të kreut në kampionatin anglez të futbollit.
Totenhemi gjer para një jave pretendonte të shpallej kampion i Premier League-s, por një barazim ndaj Çelsit i siguroi Lestërit mundësinë matematikore për fitimin e trofeut.
Dhe zhgënjimi është vënë re fare qartë në takimin e djeshëm të Totenhemit ndaj Sauthemptonit. Një sfidë e fituar 1-2 nga miqtë në “White Hart Lane” të Londrës.
Edhe pse Totenhemi do të kalonte në avantazh që në minutën e 16-të, me golin e shënuar nga Heung-Min Son, udhëtuesit janë përgjigjur me dy gola, të realizuar nga i njëjti futbollist, Steven Davis.
Humbja i rrezikon Totenhemit vendin e dytë, pasi Arsenali është vetëm dy pikë prapa. Totenhemi luan këtë të dielë ndaj Njukasëllit në transfertë, në ndeshjen e fundit të kampionatit.
Ndërsa Mançester Siti i ka komplikuar më tepër gjërat me barazimin ndaj Arsenalit. Pas atij eliminimi në Champions League me një lojë aspak frymëzuese, Man. Siti rrezikon seriozisht të humbasë vendin e katërt në Premier League.
Përballja e djeshme me topçinjtë ka përfunduar 2-2. Aguero e De Bruyne kanë qenë shënuesit për
Mançesterin, golave të të cilëve u janë përgjigjur Giroud dhe Sanchez me realizimet e tyre.
Mançester Siti mban vendin e katërt në kampionat; një pozicionim që kërcënohet nga Mançester Junajtedi, që vjen nga pas me dy pikë më pak. Por ndërsa Man. Siti ka vetëm një ndeshje për të luajtur, atë ndaj Suonsi Sitit në transfertë, në fund të kësaj jave, Man. Junajtedi do të luajë dy takime. Të martën do të udhëtojë për në fushën e Uest Hemit, e të dielën do të presë Bornmëthin. Mjafton që “djajtë e kuq” t’i fitojnë këto dy ballafaqime, dhe vendi i katërt do të jetë i tyre.
E pakëndshme do të ishte për Pep Guardiolën, trajnerin e ri të Mançester Sitit në sezonin e ardhshëm, të gjente një ekip që nuk mund të marrë pjesë në Champions League. /tesheshi.com/
