Ambasadori i SHBA-ve në Tiranë, Donald Lu, por edhe kryeministri Edi Rama, kanë thënë më shumë se një herë, duke i paralajmëruar krerët e politikës që e kundërshtojnë reformën në drejtësi, se kush do të jetë kundër saj do të ndëshkohet nga populli shqiptar.
Por çfarë përmban ky paralajmërim, dhe pse qeveria amerikane, apo edhe Rama, e dinë mirë çfarë mendon populli shqiptar dhe si do t’i ndëshkojë politikanët.
Një burim diplomatik pohoi për tesheshi.com se bëhet fjalë për një dokument shumë tronditës, i cili administrohet nga autoritetet amerikane dhe përmban lidhjet e disa zyrtarëve dhe politikanëve shqiptarë me baronë të krimit të organizuar në Shqipëri dhe në botë.
Ky dokument do të jetë dhe baza e denoncimeve apo e punës së institucioneve të reja para reformës në drejtësi.
Vetë ambasadori amerikan mësohet se u ka thënë të gjithë krerëve të politikës shqiptare, në veçanti ish-kryeministrit Berisha dhe kreut të Kuvendit, Ilir Meta, se Shtetet e Bashkuara të Amerikës kanë dijeni të plotë në lidhje me qarkun e shkurtër të mafies me politikën, e për korrupsionin që është kryer me pronën shtetërore.
Siç mësohet, ambasada amerikane ka bërë një inventar 20-vjeçar të të gjitha shitjeve të bujshme të pasurisë shtetërore të kryera në Shqipëri dhe për të cilat ka pasur akuza për abuzim.
Duke përdorur burime të hapura dhe të mbyllura, lista e zullumeve të politikës shqiptare është shkruar me përpikëri “zvicerane”. Pikërisht kjo ka shkaktuar një reaksion kaq antagonist.
Sot, ambasadori i SHBA-ve, Donald Lu, bashkë me kolegen e saj të BE-së, Romana Vllahutin, do të jenë të pranishëm në mbledhjet e tre grupeve parlamentare: në orën 13:30 me Partinë Socialiste, në selinë rozë, në orën 14:00 në selinë blu, dhe në orën 15:00 në selinë e LSI-së.
Ndërkaq, pasdite mblidhet Komisioni i Posaçëm i Reformës Zgjedhore, i cili do ta votojë dokumentin parimisht, për të nisur diskutimin nen për nen. /tesheshi.com/
