Kryetari i Frymës së Re Demokratike Bamir Topi ka hedhur akuza të forta ndaj politikës shqiptare në lidhje me sjelljen e saj dhe mungesën e hapësirave për dialog.
Në një takim me të rinjtë, në kuadër të 24 vjetorit t rrëzimit të bustit të diktatorit Hoxha, Topi i ka drejtuar një apel të rinjve që të mos vihen në shërbim të politikës, sidomos kur ajo është shëmbëlltyrë e diktaturës dhe diktatorit.
“Kemi shëmbëlltyra të sofistikuara të diktatorit, që sot janë edhe në Parlament edhe në partitë politike.
Në Parlament çohet një njeri dhe flet 20 herë duke bërë çorap ashtu sikundër ka bërë edhe më parë çdo gjë.
Parlamenti nuk bën ligje, nuk ka interpelanca, nuk kontrollohet puna e qeverisë, nuk realizon dot reformën në drejtësi. Me kë ta bëjnë këtë reformë me disa politikanë që duhet të ishin kontigjent i drejtësisë?
Unë nuk e di sesi ndihen ata deputetë kur dëgjojnë vetëm një person që merr fjalën 20 herë brenda një seance dhe thotë çdo gjë të mundshme?
Unë nuk e di sesi ndihen ata deputetë të grupit të tij parlamentar përballë një situate të tillë, pse kanë frikë, pse nuk reagojnë”, theksoi Topi.