Ish kryeministri britanik, Toni Bler, ka ngulmuar se nuk është aspak “super i pasur”, pavarësisht lajmeve se ai arrin që të fitojë nëntë herë më shumë se paga mesatare vjetore e një britaniku dhe kjo në një ditë të vetme. Ish-lideri laburist i ka bërë këto deklarata në një intervistë të dhënë për revistën “Newsweek” të botuar të enjten. Ndërkohë që e konsiderojnë si multimilioner, Bler e quan veten thjesht “me shumë fat”. Kjo intervistë është botuar pas mbështetjes zyrtare që ish-kryeministri laburist i dha fushatës së saponisur të zgjedhjeve të përgjithshme të liderit laburist, Ed Miliband.
Në lidhje me situatën e tij financare ai tha:” A jam më mirë se shumë njerëz? Po. Dhe jam me shumë fat. A mund të konsiderohem si një super i pasur? Apsolutisht jo. Dhe duhet që ta pranoni një gjë të tillë”.
Ish-kryeministri britanik është përfolur gjithmonë në lidhje me pasurinë e tij të madhe e cila vlerësohet nga disa burime të kapë shifrën e 100 milionë paundëve. Thuhet se Bler, për një fjalim publik kërkon një pagesë prej 250 000 paundësh, ose nëntë herë më e shumë se paga mesatare vjetore në Britaninë e Madhe. Një muaj më parë ai deklaroi se do t’u dhuronte laburistëve për fushatën zgjedhore 106 mijë paund dhe ky veprim u diskutua shumë në qarqet politike. Mes tyre Rhodri Glyn Thomas, një anëtar i asamblesë së Wellsit e konsideroi këtë donacion si “para gjaku”. Për britaniken “Daily Mail” ai tha se Bler ka punuar për kompani të fuqishme energjitike multinaionale si dhe diktatorë të ndryshëm me histori të rënda në shkeljet e të drejtave të njeriut.
Firma e konsulencave e ish-kryeministrit britanik, “Tony Blair Associates” thuhet se fiton 7 milionë paund në vit për këshillat që i jep presidentit të Azerbajxhanit, Nurusllan Nazarnajev. Qeveria e tij akuzohet për abuzime të të drejtave të njeriut pas masakrave që bëri ndaj protestuesve në vitin 2011. Bler ka lidhje edhe me kompaninë më të fuqishme saudite të naftës. Veç kësaj Bler dhe e shoqja thuhet se kanë edhe shumë prona në Mbretërinë e Bashkuar.
Përgatiti Dori Daka – tesheshi.com
