Grupi parlamentar i Partisë Socialiste ka përjashtuar deputetin e Shkodrës, Tom Doshi, nga radhët e tij në një mbledhje të tensionuar ku më në fund Doshi e ka parë veten të braktisur nga kolegët e tij. Gjithçka erdhi pas akuzave të Doshit se do të publikonte fakte që mund të trondisin themelet e mazhorancës.
Kryetari i PS, Edi Rama tha në mbledhje se është e pamundur bashkëjetesa me Tom Doshin duke i hapur rrugën kështu vendimit për përjashtimin e tij. Pa pritur vendimin formal, Doshi ka dalë para mediave ku ka lëshuar një deklaratë bombë, atë se Ilir Meta ka paguar dhe urdhëruar vrasjen e tij dhe deputetit të PD, Mëhill Fufi. Meta është tutori i Edi Ramës, ka thënë Doshi që ka shtuar se për këtë akuzë ndaj Ilir Metës, ka fakte dhe ka informuar deri Senatin Amerikan.
.Akuza
“Ja bëra të qartë se kush është mbas tij dhe për çfarë e bën ai këtë punë. Edi Rama sot ka një tutor që quhet Ilir Meta i cili ka paguar lekë dhe ka urdhëruar për me më vra mua dhe Mhill Fufin. Ka 5 muaj që unë ja kam bërë të qartë dhe vetë Ilirit dhe Edi Ramës dhe kryeprokurorit të Përgjithshëm dhe kryeprokurorit të Krimeve të Rënda. Unë kam informuar edhe Senatin Amerikan për këtë punë. Ja bëra të qartë Edi Ramës edhe për 21 janarin edhe të gjitha gjërat e tjera.
Cfarë provash keni? Prova është se personi që e ka marrë përsipër për me e kry këtë akt është takuar edhe me ministrin Tahiri.
Keni video? Po patjetër që i disponoj.
E ardhmja juaj tashmë që dilni nga PS? Nuk dal prej politikës ja bëra të qartë edhe Edi Ramës, nuk shkoj as te një parti tjetër, jam në gjendje të krijoj parti të re dhe do ti dal me 60 kandidatë në të gjithë Shqipërinë
Deputeti Tom Doshi mbërriti i fundit në selinë rozë, rreth 20 minuta me vonesë nga mbledhja e grupit e parashikuar për në 13:00.
Video e deklarates
.
