Policia kanadeze tha se po kërkon dy të dyshuar të cilët besohet se kanë vrarë me thikë 10 persona he kanë plagosur të paktën 15 të tjerë, ngjarje kjo e ndodhur në provincën e Saskatchewan.
Policia emëroi Damien Sanderson dhe Myles Sanderson si dy nga të dyshuarit dhe tha se ata po udhëtonin me një Nissan Rogue të zi.
Goditjet me thikë u raportuan herët në mëngjes me orën lokale dhe policia dha alarmin për një person të rrezikshëm në të gjithë krahinën. Pasdite, paralajmërime të ngjashme u lëshuan në provincat fqinje të Albertës dhe Manitobës.
Rhonda Blackmore, komandant i Policisë Mbretërore Kanadeze në Saskatcheëan, tha se autoritetet nuk e dinë nëse të dyshuarit ndryshuan automjete.
“Vendndodhja dhe drejtimi i tyre i udhëtimit nuk dihen. Është e tmerrshme ajo që ndodhi sot në provincën tonë”, tha Blackmore.
Ajo po ashtu tha se policia është ende në fazën fillestare të hetimeve, duke u përpjekur të përcaktojë marrëdhëniet mes dy të dyshuarve dhe nëse ata ishin të njohur për policinë. Ajo nuk mund të thoshte motivin e sulmit, shtuan agjencitë.
Sulmet ndodhën në disa lokacione dhe policia po heton 13 vende ku janë gjetur persona të vdekur ose të plagosur.
Policia tha se duket se disa nga viktimat ishin në shënjestër të të dyshuarit, ndërsa të tjerët u sulmuan rastësisht. Në kërkim të të dyshuarve, policia ka angazhuar forca shtesë.
Mund të ketë viktima të tjera të plagosur që janë transportuar në spitale të ndryshme, u thanë gazetarëve në një konferencë për shtyp. /tesheshi.com/
