LSI-së i është shtuar një tjetër Vasil, veç Petritit tradicional që tashmë është dhe kryetari i kësaj force pasi Meta është zgjedhur president. Është Laert Vasili, aktor dhe regjisor i njohur i Teatrit Kombëtar, i cili ka vendosur të aderojë në LSI në prag të fushatës së pritshme elektorale.
“Jam i sigurt për fitoren dhe për të ardhmen e Shqipërisë. Jam shumë i sigurt kur shoh se ju nuk jeni nga ata që do bëni dokumentet për të fituar lotarinë për të braktisur këtë vend. Por ju do jepni energjinë tuaj për ta bërë këtë vend, siç zgjodha unë që pas 20 vjetësh të kthehem në Shqipëri pas një karriere jashtë. Ju siguroj se emocionin më të fortë nuk e kam ndjerë në asnjë publik në vendet e Europës, por sot këtu tek ju, tek Lëvizja Rinore për Integrim”, tha Laert Vasili në një aktivitet të LRI-së.
Ky është i pari rast kur kjo forcë promovon një “blerje” të rëndësishme nga shoqëria civile, në këtë rast bota e kulturës. /tesheshi.com/
