VMRO, si parti fituese e zgjedhjeve të parakohëshme të 11 dhjetorit në Maqedoni po vazhdon presionin mbi ish-partnerin e saj të koalicionit, BDI-në, që mos të bëjë qeveri me LSDM-në, duke ia rikujtuar parimin “fituesi me fituesin”, për të cilin BDI para ca kohësh ka kërkuar që ky rregull të bëhet ligj dhe jo veç parim.
“Për shkak se jemi vend multietnik ka një rregull që në të kaluarën partitë shqiptare kanë kërkuar të jetë edhe ligj, jo vetëm parim. VMRO-ja atëherë deklaroi se është më mirë që të mbetet në parim, për shkak se është e jashtëzakonshme që të bëhet ligj, ky është ai parimi që “fituesi me fituesin të formojnë qeveri. Në këtë temë kemi pasur shumë konferenca për shtyp dhe intervista, sidomos për shkak se edhe bashkësia ndërkombëtare ka kërkuar që të jetë parim. Vetë kryetari i BDI-së ka deklaruar se nëse nuk merret në qeveri partia fituese tek shqiptarët do të bëhet defaktorizimi i shqiptarëve. Tani për herë të parë erdhi situata kthyese, tani gjithçka varet prej BDI-së se çfarë qeverie do të ketë në të ardhmen”, thuhet në kumtesën e VMRO-DPMNE-së.
Mirëpo nga partia e Gruevskit thonë se gjenden në një presion të madh nga kryesia e tyre, që në asnjë mënyrë mos të pranojnë shkeljen e vullnetit të popullit të cilët ua kanë besuar votën VMRO-së. Siç thonë ata nëse është nevoja do të luftojnë që të mbrojnë parimin “fituesi me fituesin”.
“Ne gjendemi nën presion të madh nga votuesit dhe anëtarësia jonë që të luftojmë dhe të mos e lejojmë shkeljen e këtij parimi, sepse ne në mënyrë të drejtë veprojmë gjatë tërë kohës dhe tani dikush tjetër nuk vepron në mënyrë të drejtë ndaj nesh”, kështu përfundon kumtesa e VMRO-së.
Kjo parti ka paralajmëruar protesta masive kundër formimit të qeverisë ndërmjet LSDM-së dhe BDI-së nën moton “Maqedonia e maqedonasve”.
Kujtojmë se një thirrje për luftë bëri sot dhe kreu i PD-së, Lulzim Basha, gjatë fjalës së tij në ditën e 7 të protestës së opozitës para Kryeministrisë. /tesheshi.com/
