Kryeministri Rama ka marrë një tjetër mbështetje ndërkombëtare për “Anti-KÇK”-në e tij të diskutueshme, kësaj here nga Komisioneri për Zgjerim, Oliver Varhelyi.
“Diskutim në mëngjes me Kryeministrin e Shqipërisë dhe Ministrat e Jashtëm të BE-së, të organizuar nga Luigi di Maio. Diskutim i mirë mbi përparimin e reformat dhe solidaritetin e fortë me Shqipërinë pas tërmetit të nëntorit përpara konferencës së sotme të donatorëve ndërkombëtarë. Jo vetëm që kanë plotësuar kushtet, por shpejtësia e reformave është shtuar. Përgëzoj operacionin OFL. Ngrirja e aseteve të të dënuarve tregon lidership në luftën kundër krimit”, shkroi zyrtari i lartë i Brukselit.
Nga ana tjetër, organizatori i këtij mëngjesi, kreu i diplomacisë së Romës Luigi di Maio tha se ka një vetëdije të ngritur të BE-së mbi integrimin rajonal. “Angazhimi ynë kolektiv konfirmon edhe njëherë se ne të gjithë jemi të vetëdijshëm se çfarë është në lojë, përfshirë edhe besueshmërinë e BE-së si aktor global. Integrimi i Ballkanit Perëndimor mbetet investimi jonë kyç, gjeostrategjik e politik, për të përforcuar paqen, pajtimin, stabilitetin dhe prosperitetin në Europë”, tha ministri i Jashtëm italian, mesazhe të dhëna këto në prezencë të shefit të qeverisë shqiptare. /tesheshi.com/
