Një ditë para festës së Fitër Bajramit, drejtues të institucioneve kosovare kanë marrë edhe mesazhet e para nga miqtë ndërkombëtarë.
Sekretari amerikan i shtetit, Rex Tillerson i ka dërguar letër urimi me rastin e Fiter Bajramit, ministrit në detyrë të Punëve të Jashtme të Kosovës, Enver Hoxhaj.
Në letrën e dërguar për kreun e diplomacisë së Prishtinës, Tillerson përcjell urimet në emër të qeverisë dhe popullit amerikan, duke e vlerësuar festën e Fiter Bajramit si kulminacionin e lutjes, mëshirën dhe mirëqenies pas muajit të shenjtë të Ramazanit.
Tillerson shkruan se kjo festë është mundësia më e mirë për t’i rikonfirmuar marrëdhëniet e mira dhe dëshirën e përbashkët për të punuar me njëri tjetrin për ta bërë një botë me komunitete që jetojnë në paqe dhe prosperitet.
Ajo që bie në sy në këtë rast, është se mesazhi i kryediplomatit amerikan i adresohet një zyrtari që në mos ateist, është krejtësisht laik. Enver Hoxhaj, politikan i njohur i PDK-së, tashmë nën drejtimin e Kadri Veselit, është i njohur për qëndrimet e tij të akullta karshi faktorit fetar, gjegjësisht musliman në Kosovë. Dhe në këtë rast, mesazhi i sekretarit Tillerson flet shumë për modelin laik amerikan të respektit ndaj ndjeshmërive fetare, të ngritur në sistem. /tesheshi.com/
