Gruaja që drejton Komisionin Evropian, Ursula von der Leyen paralajmëroi të mërkurën Parlamentin Evropian se pas largimit të Britanisë së Madhe nga Unioni, BE përballet me një deficit buxheti prej 75 miliardë eurosh për periudhën e 7-vjeçare, por që mund të dilet nga situata me një plan fiskal ambicioz.
Ajo mori pjesë në një debat në seancën plenare të Parlamentit Evropian në Strasburg për përgatitjen e mbledhjes së jashtëzakonshme të Këshillit Evropian të 20 shkurtit në Kuadrin Financiar Shumëvjeçar (MFF).
“Si Union i 27 vendeve, ne kemi më pak burime. Ka rreth 75 miliardë euro më pak për buxhetin 7-vjeçar nga 2021 deri në vitin 2027 dhe në të njëjtën kohë sfida që asnjë anëtar nuk mund t’i adresojë vetëm,” tha Von der Leyen.
Ajo ua sqaroi deputetëve se koha po mbaronte dhe se, “nëse buxheti nuk miratohet së shpejti, vitin e ardhshëm nuk do të ketë asnjë mundësi për të financuar përparësitë e reja që janë caktuar”.
Sipas fjalëve të saj, është koha për të rënë dakord për një pozicion të përbashkët, por, “më e rëndësishmja, për të arritur një ekuilibër midis përparësive të vjetra dhe të reja”.
Ajo kujtoi që të tre institucionet – Parlamenti, Këshilli dhe Komisioni – ranë dakord për një axhendë strategjike për ta bërë Evropën kontinentin e parë që të ishte neutral ndaj klimës deri në vitin 2059.
“Unë nuk do të pranoj asnjë rezultat që nuk do të garantojë që të paktën 25 përqind e buxhetit të caktohet për ndryshimin e klimës,” tha Von der Leyen. /tesheshi.com/
