Nga Blendi Gashi
“Kemi me çue në shpi Qeverinë me anë të protestave”. Ky është mesazhi që po e përcjell Lëvizja ‘Vetëvendosje’, që nga themelimi i Asociacionit të Komunave me shumicë serbe, të cilin po e kundërshton fuqishëm.
Kjo Lëvizje po mban takime në të gjitha komunat me qytetarë të cilëve po ua shpejgon pse Asociacioni është i dëmshëm dhe njëkohësisht po i fton ata që të bëhen gati dhe të dalin të protestojnë deri në rrëzimin e Qeverisë.
Për mbajtjen e protestave është edhe partia tjetër opozitare Aleanca për Ardhmërinë e Kosovës (AAK), por thotë se nuk do t’i mbështet protestat e dhunshme.
Analistët politik shprehen se çdo tentim i partive opozitare për të rrëzuar Qeverinë përmes protestave të dhunshme do të ishte një gabim i madh që do t’i sjellte dëme të mëdha vendit. Sipas tyre marrja e pushtetit duhet të ndodh vetëm përmes metodave demokratike dhe konkurencës së shëndoshë.
Analisti politik, Fatmir Sheholli, ka deklaruar për portalin “Te Sheshi”, se qytetarët e Kosovës dhe shteti i Kosovës ka përzgjedhur rrugën properëndimore që do të thotë procivilizuese dhe demokratike.
Ai thotë se çdo pretendim që me dhunë të rrënohet ky vizion dhe orientimi i Republikës së Kosovës qysh në start është i dështuar.
“Sa i përket thirrjeve për rrënim të pushtetit në Kosovë konsiderojë se parasegjithash duhet të jemi shumë vigjilent në pasojat që mund të sjellë rrëzimin apo përpjekja për rrëzimin e pushtetit me dhunë. Nuk ka vend në botë ku pretendimet për rrënimin e pushtetit me dhunë nuk kanë përfunduar me gjakderdhje dhe viktima. Kosovës nuk i nevojitet kjo. Shtetit të Kosovës i nevojitet urgjentishte unitet nacional dhe strategji dalëse nga labirinthi në të cilin qytetarët e Kosovës kanë mbetur të vetmit në këtë pjesë të izoluar dhe nevojitet ngritje e kualitetit arsimor, ekonomik, kulturor dhe rritje e punësimit”, ka thënë ai.
Analsti Sheholli thekson se protestat duhet dhe janë të shëndetshme në shoqëritë demokratike, por jo protesta të dhunës dhe shkatërrimit të pasurisë së shtetit dhe individëve. Sipas tij çfarëdo skenar i përshkallëzimit të situatës, Kosovën do ta sjellë në situatë të palakmueshme dhe me pasoja të pariparueshme. Sheholli pohon se shoqëria kosovare ka nevojë për ‘refresh’ të skenës politike por assesi përmes dhunës dhe gjakderdhjeve e viktimave.
“Rrëzimi i Qeverisë duhet të bëhet me mjete civilizuese demokratike siç janë: konkurrenca me projekte zhvëllimore para qytetarëve, konkurrenca me ide për dalje nga një situatë izoluese dhe konkurrenca për sqarimin para qytetarëve si do tejkalohen ato sfida. Kosova nuk eshte ‘reality show’, që të ekspozohet para një auditoriumi të caktuar por Kosova është shtet”, ka deklaruar Sheholli.
Njohësi i rrethanave politike në vend, Florim Zeqa, mendon se pas shtjerrjes së të gjitha mundësive institucione (në Kuvendin e Republikës së Kosovës), dialogut mbrenda faktorit politik shqiptar duhet të vijnë në shprehje format e tjera të veprimit, si protestat. Ai thotë se mbrojtja e shtetit pa dallim partiak apo fetar, me të gjitha mjetet demokratike duke filluar nga: protestat, demonstratat, grevat e pergjithëshme deri në një rezistencë aktive e paqësore mbarëkombëtare është e drejtë natyrore të cilën nuk mund ta mohoj as komuniteti ndërkombëtar.
“Shteti i Kosovës duhet të mbetët kështu si është, Republika e Kosovës pa fusnota dhe pa asociacine etnike, ngase ndryshe nuk mund të ekzistoj si i tillë, sikurse pavarësia që duhet të jetë e plotë ose ndryshe nuk mund të quhet ashtu, nuk ka gjysëm pavarësi, as gjysëm liri. Në rast të përshkallëzimit të situatës, rënia e kësaj qeverie është e pashmanghsme dhe si rezultat do të imponohet krijimi i menjëhershëm i një Qeverie të shpëtimit kombëtar në mbrojtje të shtetit të Kosovës deri në mbajtjën e zgjedhjeve të lira e demokratike”, ka deklaruar Zeqa për portalin “Te Sheshi”.
Kryrtari i Aleancës për Ardhmërinë e Kosovës (AAK), Ramush Haradinaj, ka shprehur besimin se protestat mund ta ndryshojnë Kosovën. Në një intervistë për RTK-në, Haradinaj ka përjashtuar mundësinë që AAK të jetë pjesë e protestave që do ta ‘djegin’ Kosovën’.
“Protesta është mënyra adekuate dhe ne shpresojmë që përmes protestës do të ndryshojë Kosova. Jemi në diskutime të vazhdueshme për ta penguar degradimin e mëtejmë të vendit për shkak të qeverisjes së dobët”, ka thënë ai. Haradinaj ka vlerësuar se protestat e dhunshme nuk do të ndryshojnë gjendjen për të mirë. Ai ka paralajmëruar se Kryesia e AAK-së do të mblidhet të mërkurën për të vendosur përfundimisht sa i përket protestave.
Ndryshe, deputeti i Lëvizjes ‘Vetëvendosje’, Fisnik Ismaili, ditë më parë ka postuar në rrjetet sociale një fotografi së bashku me nënkryetarin e komunës së Prishtinës, Dardan Sejdiu. Ata janë fotografuar në Parkun Nacional të Gërmisë ndërsa përmes kësaj fotografie, Ismaili ka paralajmëruar se janë duke u përgatitur fizikisht për rrëzimin e qeverisë. “Përgatitjet e fundit fizike për rrëzimin e qeverisë. #poshte #isa #me #hajnat #tjere”, kishte shkruar deputeti Ismaili. /tesheshi.com/
