Ish-Presidenti amerikan Barak Obama bëri thirrje për veprim në përgjigje të të shtënave masive në vend dhe u bëri thirrje amerikanëve të “refuzojnë zëshëm” udhëheqësit që ushqejnë “klimë frike dhe urrejtjeje”.
Ai dha një deklaratë të gjatë pasi më shumë se 30 njerëz u vranë në të shtëna masive në El Paso, Teksas dhe Dayton. Ai nuk përmendi asnjë lider specifik, por komentet e tij u panë si një qortim i porositur për Presidentin Donald Trump.
“Ne duhet të refuzojmë zëshëm gjuhën që del nga goja e ndonjë prej udhëheqësve tanë që ushqen klimë frike dhe urrejtje dhe normalizon ndjenjat raciste; udhëheqësit që demonizojnë ata që nuk duken si ne, ose kërcënojnë mënyrën tonë të të jetuarit, ose u referohen njerëzve të tjerë si nën-njerëzorë, ose nënkuptojnë se Amerika i përket vetëm një lloji të caktuar njerëzish, duhen ndëshkuar”, tha Obama.
Ai vuri në dukje se retorika nuk është e re, porse “nuk ka vend për të në politikën dhe jetën publike”.
Obama bëri thirrje për zbatim të ligjit dhe platformave të tjera për të kufizuar ndikimin e grupeve të urrejtjes, duke vënë në pah se personi i armatosur në El Paso ndoqi një model të ngjashëm me agresorë të tjerë, dhe se ai ishte i radikalizuar me ideologjitë raciste.
Ish-presidenti u tregua i përmbajtur të komentojë drejtpërsëdrejti për Trump apo politikat e tij, duke folur herë pas here për çështje të tilla si tërheqja nga marrëveshja bërthamore e Iranit dhe ndalimi i udhëtimit.
Në konferencën e tij të fundit për shtyp para se të largohej nga detyra, Obama u tha gazetarëve se ai do të ndjehej i detyruar të dilte në publik sërish nëse e sheh se “vlerat thelbësore” të vendit po kërcënoheshin. Ai përmendi diskriminimin sistematik dhe dëbimin masiv të “ëndërrimtarëve” si dukuri për të cilat ai mund të flasë.
Trump e ka quajtur vazhdimisht fluksin e emigrantëve nga Amerika Qendrore një “pushtim”. Ai gjithashtu ka etiketuar emigrantët që hyjnë në mënyrë të paligjshme në SHBA si “banditë” që sjellin krim dhe sëmundje. Administrata Trump miratoi gjithashtu një politikë me tolerancë zero që çoi në ndarjen e qindra familjeve emigrante, një praktikë e ndalur zyrtarisht vitin e kaluar përballë protestave të përhapura. /tesheshi.com/
