Korça do jetë qyteti i parë i gazifikuar në Shqipëri. U tha kjo nga kryeministri Rama, nga kryeqytetin azer Baku, i ftuar nderi i Presidentit Ilham Alijev, në Samitin e 10-të të Korridorit Jugor të Gazit në Baku, Azerbajxhan.
“Shqipëria është 100% e mbështetur si vend në energjinë e ripërtëritshme, por kërkon të diversifikojë burimet e energjisë, që aktualisht mbështeten në burime hidrike”, tha Rama, duke theksuar se tanimë është gati studimi i gazifikimit të zonës së Korçës, si hap i parë i programit të shtrirjes së gazit për konsum të përgjithshëm në Shqipëri.
Ndërsa në Vlorë do ketë një qendër gazi të lëngshëm, siç u tha prej tij.
“Duke u mbështetur në përvojën e suksesshme me TAP synojmë të ndërtojmë një qendër gazi të lëngshëm natyror në Vlorë”.
Duke folur për partneritetin me Azerbajxhanin, Rama tha se “kjo rrugë e re e mëndafshtë e energjisë është shndërruar në një urë të bashkëpunimit intensiv me një format që shton dëshirën dhe mundësitë që ofron.
Sot ky format është shndërruar në një urë ku pjesë e re përbërëse është bërë edhe dimensioni i energjisë që gjelbër. Sot jemi dëshmitar se korridori i gazit ka ndryshuar shumë jetë dhe e ka bërë Evropën më të sigurt. Korridori jugor i gazit do të mbetet një nga korridoret më të sigurta. Me axhendën e gjelbër, gazi i Azerbajxhanit janë thelbësor për të ardhmen tonë të përbashkët. Ne jemi të pozicionuar startegjikisht në rrugën e gazsjellësit trans-adriatik”.
Nga ana tjetër, presidenti azer Ilham Aliyev tha se “Shqipëria ka luajtur një rol shumë të rëndësishëm në zbatimin e projektit të korridorit jugor të gazit dhe vazhdon të luajë një rol të rëndësishëm si anëtar i ekipit të TAP-it”.
“Tashmë po diskutojmë aspekte të ndryshme të bashkëpunimit tonë energjetik dhe jam i sigurt që gjatë diskutimeve të sotme me kryeministrin do të trajtojmë të gjitha çështjet që ekzistojnë”, tha Aliyev. /tesheshi.com/
