Themelimi i “Zajednicës”, pas Demarkacionit, është një prej sfidave që e pret qeverinë e re kosovare. Ramush Haradinaj, kandidati për kryeministër nga koalicioni PDK-AAK-Nisma, thotë se ky asociacion mund të bëhet vetëm sipas Kushtetutës dhe në asnjë mënyrë tjetër.
“Gjykata Kushtetuese ka gjetur se kjo marrëveshje nuk është në frymën kushtetuese. Pas këtij vendimi, ne duhet të jemi të disiplinuar dhe ta zbatojmë Kushtetutën e Kosovës. Kushtetuta jonë ka paraparë mundësinë e organizimit të asociacioneve që mund të jenë organe vetëm koordinuese, por jo vendimmarrëse, dhe s‘ka veprimtari ekzekutive,” ka thënë Haradinaj në një intervistë për Dojçe Vele.
I pyetur se sa ekziston mundësia që “Zajednica” të jetë në pazar me mbështetjen e serbëve për krijimin e ushtrisë, ai ka thënë se Kosova nuk bën pazar për temat e veta të brendshme.
“Logjika e deritanishme ka perënduar. Në Kosovë do të fillojë një logjikë e re qeverisëse, dhe ne nuk do të jemi peng i askujt,” ka qenë përgjigjja e Haradinajt. /tesheshi.com/
