Pas kritikave të ashpra ndaj ndërkombëtarëve për Gjykatën Speciale, presidenti Hashim Thaçi, ka zbutur qëndrimin duke thënë se si kryeministër atë kohë ka marrë vendimin e duhur.
Ai ka thënë se për Specialen kanë qenë dy mundësi në tavolinë. E sipas tij, është zgjedhur opsioni që sjell më pak pasoja për Kosovën.
“Që të evitohen keqinterpretimet e qëllimshme apo paqëllimshme, kurrë nuk marr një vendim pa e menduar mirë në secilin aspekt, i tillë ka qenë edhe angazhimi im personal si përgjegjës i institucioneve, angazhimi dhe votimi në Kuvend me 2/3 e votave për themelimin e Gjykatës Speciale. Nuk ka lëkundje në pozicionin tim, rikonfirmoj këtë pasi kemi bërë zgjedhjen më të mirë në kuadër të rrethanave. Ne kemi pasur dy mundësi, që të dyja kanë qenë të vështira dhe të këqija, opsioni i parë ka qenë që Bashkësia Ndërkombëtare ka imponuar dhe kemi pranuar – Specialja të funksionojë me ligjet e Kosovës. Opsioni i dytë, nëse refuzojmë themelimin e Speciales nga institucionet tona, kjo do të bartet në OKB, kështu që kemi shkuar me opsionin e parë. Mund të ketë diskutime dhe vlerësime të ndryshme, por dua të theksoj se veprimi ka qenë i përgjegjshëm me qëllim të ruajtjes, kultivimit dhe afirmimit të bashkëpunimit me SHBA-të, shtetet tjera perëndimore dhe NATO-n. Mes dy opsioneve të këqija, lidershipi dhe deputetët e Kosovës kemi zgjedhur opsionin që konsideroht se sjell më pak pasoja për Kosovën”, ka deklaruar Thaçi.
Ai më tej tha se është bërë zgjedhja e duhur me themelimin e Speciales, por sipas tij themelimi i kësaj gjykate “nuk është perspektiva e vetme e Kosovës”.
“Jemi tërësisht të izoluar dhe pa perspektivë, shqetësimi im s’ka të bëjë më Specialen por me gjendjen e rënduar të Kosovës dhe perespektivën në familjen euro-atlantike”, tha Thaçi. /tesheshi.com/
