Presidenti Thaçi i është shmangur me stil një komenti të tij mbi vendimin ekstrem të qeverisë së Haradinajt për tarifim 100 përqind të mallrave nga Serbia dhe Bosnja që hyjnë në Kosovë.
Deri më tani ai nuk është deklaruar mbi këtë masë, e cila ka provokuar një krizë të radhës mes Prishtinës dhe Beogradit, ardhur në kohën kur vetë ai, Thaçi, po investohet në arritjen e një marëveshjeje historike me Serbinë, ku përfshihet dhe korrigjimi i kufijve, pas së cilës pretendon se do vijë njohja e Kosovës nga Serbia.
Ai tha gjatë një interviste në Këshillin Atlantik në Uashington se një marrëveshje gjithëpërfshirëse mbi normalizimin e marrëdhënieve Beograd-Prishtinë do të mbyllë kutinë e Pandorës në Ballkan pas shekullit të konfliktit.
Ai vlerësoi se të dyja palët tani janë “të gatshme për të arritur marrëveshje”. Thaçi tha se momenti i tanishëm është një precedent për rajonin, por që “dy kombet sovrane duan një marrëveshje” për të cilën nevojitet një kompromis.
“Ndonjëherë mund të keni të drejtë rreth 100 për qind, por nëse doni të arrini në marrëveshje, duhet të jeni gati për një kompromis”, tha Thaçi.
Dhe i pyetur nga audience, më saktë nga disa zëra boshnjakë, rreth futjes së tarifimit të lartë doganor, Thaçi u përgjigj:
“Në fund, ne jemi viktima të agresionit të njëjtë, dhe çështjet e përditshme me të cilat përballemi do të tejkalohen me vullnetin e mirë të aktorëve rajonalë, BE dhe SHBA”, tha Thaçi.
Ndërkohë, veç Serbisë, Kosovën nuk e ka njohur akoma edhe Bosnja, e cila udhëhiqet nga një Presidencë trepalëshe. Prishtina ka ankesa dhe për politikën e Bosnjës, sipas së cilës qëndron krah asaj të Beogradit, kundër Kosovës. Gjithnjë referuar elementit serb në pushtet. /tesheshi.com/
