Numri dy i qeverisë së Kosovës dhe kreu i PDK-së, Hashim Thaçi, deklaroi se një tërheqje e marrvëshjeve ndërkombëtare të nënshkruara: ajo për Asociacionin dhe Demarkacionin do të rrëzojë shtetësinë e Kosovës.
Thaçi në intervistë për RTK tha se marrëveshjet ndërkombëtare nuk “janë lojë fëmijësh”.
“Njerëzit duhet ta kuptojnë se rënia e këtyre marrëveshjeve nënkupton ç’instalimin e shtetit të Kosovës, kjo nuk është lojë fëmijësh. Këto dy marrëveshje nuk duhet të shndërrohen si mjete për shkatërrimin e shtetit”, tha Thaçi.
Duke folur për Asociacionin, ai tha se vendimi i Gjykatës Kushtetuese e thotë qartë se ai do të formohet. Thaçi shtoi se protestat e paralajmëruara nga opozita në janar, nëse janë demokratike, atëherë nuk ka problem që të zhvillohen, por ai tha se opozita ka nevojë që të komunikojë më shumë për të ardhmen e vendit.
“Protesta mund të ketë, kemi probleme sociale sepse ne nuk kemi bërë atë që kemi dëshiruar. Gjithçka që është në suaza të demokracisë është e pranueshme. Është me rëndësi që të ketë më shumë komunikim më tepër marrëveshje për shtetformimin e Kosovës. Këtë e them për opozitën që të shikojnë mundësinë për forcimin e shtetit”.
Thaçi foli edhe për postin e presidentit të cilin pritet ta marrë në vitin 2016. Ai tha se ky proces duhet shikuar si proces normal demokratik dhe se ai beson se marrëveshje në mes të LDK-së dhe PDK-së do të realizohet.
“Unë kam pasur mundësi që të zgjedhem 2-3 herë president i Kosovës. Jam njeriu më i votuar në vend. Është një proces krejt i natyrshëm edhe zgjedhja e presidentit. Ai duhet shikuar si proces i natyrshëm. Do të respektohet në tërësi në mes të PDK-së dhe LDK-së. Kemi legjitimitet të plotë dhe jemi mazhorancë e fuqishme me rreth 90 vota. Do të jetë një proces transparent dhe në këtë drejtim nuk shoh asnjë problematikë.
Ne jetojmë në sistemin demokratik, votimi është i fshehtë. Unë do ta ruaj unitetin politik dhe do t’ju shërbej të gjithë qytetarëve të vendit. Do të jem garant kushtetues dhe ligjor. Ka deputetë që nuk i votojnë as njerëzit e partive të vet”, tha Thaçi.
/tesheshi.com/
