Presidenti i Kosovës Hashim Thaçi, ka publikuar një foto të tij me homologun amerikan Trump, dalë në Paris, në darkën e shtruar nga presidenti Macron me liderët botërorë, në kuadër të 100-vjetorit të fundit të Luftës së Parë Botërore.
Sipas Thaçit, në këtë takim “në këmbë”, siç duket dhe nga fotoja, ai ka marrë mbështetje nga udhëheqësi i Shtëpisë së Bardhë për marrëveshjen me Serbinë.
“Në Paris takova presidentin e SHBA-së, Donald Trump, të cilin e falënderova për mbështetjen e SHBA-së për Kosovën dhe rolin e saj vendimtar për lirinë, pavarësinë dhe shtetndërtimin. Në këtë periudhë të rëndësishme për Kosovën ishte inkurajuese të dëgjoj se presidenti Trump mbështet “100% arritjen e një marrëveshjeje ligjërisht të obligueshme ndërmjet Kosovës dhe Serbisë”. Ne në Kosovë jemi dhe do të mbetemi përherë mirënjohës ndaj SHBA-së dhe popullit amerikan”, shkruan Thaçi në FB.
Nga pikëpamja protokollare, takimet të tilla “rastësore” nuk përmbajnë biseda për tema të mprehta e serioze, por janë thjeshtë kortezialitete që shoqërohen nga përshëndetje të zakonta, të kufizuara brenda kohës së një shtrëngimi duarsh. /tesheshi.com/
