Presidenti Thaçi ka lëshuar deklarime të forta duke folur mbi aktualitetin politik të Kosovës, e kjo në raport me ndërkombëtarët.
I pranishëm në konferencën “20 vite pas: Perspektivat dhe Sfidat për Ballkanin Perëndimor”, Thaçi përmendi ato që i quajti “arritje të Kosovës”, por duke konkluduar se “Europa i ka mbyllur derën”, referuar mosliberalizimit të vizave.
“Jemi duke kaluar në një fazë të një udhëkryqi që duhet të marrim edhe vendime jo të lehta. Kosova është një storie e suksesit, por nuk është e përfunduar. Ende pesë shtetet e BE-së nuk e kanë njohur Kosovën, aspirata jonë është anëtarësimi. Ende nuk kemi arritur marrëveshje mes Kosovës dhe Serbisë, ende nuk jemi anëtarësuar në OKB ku kemi një veto nga Rusia.
Ndërsa, nuk shihet në horizont ndonjë faktor që mund ta bind Rusinë që ta heq veton që Kosova të anëtarësohet. Kemi sfidat tona të brendshme, por që kemi bërë progres qoftë në rend dhe ligj, qoftë me themelimin e ushtrisë së Kosovës.
Po ndodh ajo që nuk do të duhej të ndodhte, sot BE ka mbyllur dyert për Kosovën.
Ne kemi përmbushur të gjitha kriteret, tash e tri vite është dhënë rekomandimi për viza dhe nuk ka vendim. Jo me fajin tonë ky izolim, por nga paaftësia e shteteve anëtare për të marrë vendim për liberalizim të vizave. Të gjitha kriteret i kemi përmbushur, edhe luftën kundër krimit dhe korrupsionit”, deklaroi kreu i shtetit të Kosovës.
E nga ana tjetër, Thaçi tha se nuk do ketë asnjë lëshim ndaj Serbisë për hir të vizave.
“Qëndrimi im është se as nuk do të ketë autonomi dhe nuk do të ketë Asociacion, sepse ajo do të nënkuptonte një Republikë serbe brenda Kosovës. Po, unë vet jam pajtuar më herët që të ndodhë diçka e tillë, por kanë ndryshuar rrethanat. Për hir të liberalizimit të vizave nuk mund t’i japim Asociacion, edhe taksa duhet të mbetet në fuqi”, deklaroi presidenti Thaçi. /tesheshi.com/
