Për herë të parë, presidenti Thaçi i është kundërvënë fuqishëm Haradinajt që kur ky i fundit mori postin e kryeministrit për çështjen e Demarkacionit me Malin e Zi, duke kërkuar nga qeveria dhe Kuvendi pa vonesa ta ratifikojnë marrëveshjen me Malin e Zi, sipas versionit të nënshkruar në vitin 2015.
Thaçi mbetet i vendosur se ai nuk ka gabuar kur ka nënshkruar marrëveshjen, andaj, komisionin e ri të Haradinajt e quan në një formë të dëmshme, pasi thotë se nuk mund të ketë ekspertizë më të mirë se të ndërkombëtarëve për çështjen në fjalë.
“Unë qëndroj fuqishëm pas atij nënshkrimi (të marrëveshjes) dhe vlerësoj se ka qenë i drejtë. Ka opinione të ndryshme, por faktet nuk ndryshojnë. Kemi vlerësimet e Komisionit shtetëror të Kosovës, ekspertëve ndërkombëtarë, vlerësimeve të NATO-s, SHBA-së, Bashkimit Evropian dhe nuk e dimë se me kë tjetër të konsultohemi”, tha Thaçi, duke i ftuar Qeverinë dhe Kuvendin të procedojnë tutje me ratifikim pa vonesa. Kushdo që kërkon ekspertizë akademike, duke tejkaluar ekspertizat e NATO-s, Uashingtonit e Brukselit, besoj se këto janë të dëmshme. Nëse duam liberalizimin e vizave, duhet të ratifikohet Marrëveshja për demarkacionin me Malin e Zi e nënshkruar në gusht të vitit 2015”, ka deklaruar Thaçi.
Këto komente presidenti i ka bërë gjatë një debati në Prishtinë të organizuar në lidhje me transformimin e Forcave të Sigurisë së Kosovës në Forca të Armatosura.
Mbetet të shihet se cila do jetë kundërpërgjigja e Haradinajt, kur dihet se ky i fundit e quan të dëmshme për vendin, marrëveshjen e nënshkruar nga Thaçi. /tesheshi.com/
