Një debat i hapur është zhvilluar në Mitrovicë ndërmjet Hashim Thaçit, Presidentit të Kosovës dhe disa organizata të shoqërisë civile serbe në lidhje me themelimin e ushtrisë së Kosovës.
Debati është moderuar dhe organizuar nga gjermanët e Fridrich Ebert dhe megjithëse me kundërshtime ka pasur tone të qeta. Presidenti i Kosovës është munduar të garantojë serbët se ushtria e re e Kosovës do të jetë për të gjithë komunitetet, edhe për serbët.
“Jam i bindur që ky hap final i bërjes së Kosovës me Forca të Armatosura, pas një periudhe të gjatë të zhvillimit të Forcave të Sigurisë, në një partneritet të shkëlqyeshëm me SHBA-në, KFOR-in dhe NATO-n, është në interes të gjithë qytetarëve të Kosovës, në interes të gjitha komuniteteve, të sigurisë dhe paqes në Kosovë dhe në rajon. Për më tepër, duhet ta bëjmë të qartë se Forcat e Armatosura të Kosovës nuk paraqesin asnjë lloj kërcënimi ashtu siç nuk paraqet sot asnjë kërcenim FSK-ja”, ka thënë Thaçi, i cili shtoi se tani është faza finale për ta vulosur ngritjen e armatës.
Ndërkaq, Jovana Radosavljeviç, drejtoreshë ekzekutive e Iniciativa e Re Sociale (NSI), tha se hulumtimin e bërë nga organizata të cilën e drejton ajo, në pyetjen për themelimin e FAK, ka deklarime kundërthënëse nga përfaqësuesit politik të serbëve të Kosovës.
“Ka një mendim që kjo temë do të duhej të përfshihej në kuadër të agjendës së bisedimeve në mes Kosovës dhe Serbisë. Prandaj konsideroj se Qeveria e Kosovës do të duhet të japë sqarime shtesë, që të largohet frika dhe paqartësitë nga ky proces”, ka theksuar ajo.
Radosavljeviç duke polemizuar me Thaçin deklaroi se “anashkalimi i Kushtetutës për themelimin e forcave të armatosura, është i papranueshëm për serbët e Kosovës, dhe një veprim i tillë i institucioneve të vendit, do të dërgonte një mesazh negativ dhe do të përçonte ndenjën e pasigurisë tek këta qytetarë. Serbët mendojnë se prezenca e KFOR-it dhe NATO-s, është një garanci e mjaftueshme dhe nuk ka nevojë për themelimin e FAK, duke ia shtuar këtu faktin se Kosova nuk rrezikohet nga jashtë dhe brenda kufijve”.
Përfaqësuesja e OJF-ve serbe tha se në zgjedhjet e fundit lokale Lista Serbe është tashmë partia përfaqësuese e këtij minoriteti në Kosovë dhe themelimi i ushtrisë duhet të kalojë nga kjo forcë politike. /tesheshi.com/
