Karlos Tevezit nuk i ka ngjitur, siç ai mendonte, futbolli kinez. Argjentinasi që u ble me bujë nga Shangai Shenhua, nuk po kalon një moment të mirë, qoftë në aspektin profesional, qoftë në atë personal.
Në një intervistë të fundit, “Apashi”, siç e quajnë tifozët, ka deklaruar se e ndjen mungesën e një atmosfere të tillë si ajo që krijohej kur luante në Europë, apo me Boka Xhuniorsin në Argjentinë.
“Këtu nuk jetohet sporti si në Europë apo Amerikën e Jugut, ku të gjithë fillojnë të luajnë futboll që fëmijë. Ka një mënyrë ndryshe të të parit të gjërave. Teknikisht nuk janë edhe aq të mirë dhe mendoj se nuk do të arrijnë ta mbushin hendekun që kanë me kontinentet e tjera, as për 50 vjet”, është shprehur sulmuesi argjentinas.
Tevez ka hyrë “në bela” edhe me drejtuesit e klubit të Shangait, të cilët janë shprehur pak ditë më parë se ende nuk e shohin si lojtarin që pretenduan se blenë. Sipas presidentit të klubit, edhe pse është lojtari më i paguar në botë, Tevez është ende shumë i shëndoshë për tu hedhur në fushën e lojës. Natyrisht fjalë të rënda këto për një “kokshkretë” si Karlos, i cili, ka dëshmuar se për një fjalë goje, i bën “naftën” kontratave, sado të majme të jenë ato. Megjithatë kush e di: ndonjëherë me kalimin e viteve, temperamenti yt dhe shifrat që të vënë para syve, nuk shkojnë gjithnjë në përpjestim të drejtë. /tesheshi.com/
