Mbretërit nuk u treguan aspak të mëshirshëm për miqtë e Rayo Vallecanos, duke i përcjellë në shtëpi me plot dhjetë gola. Në fakt, udhëtuesit kishin përgatitur një befasi për mbretërit, duke shënuar dy gola në fillimin e ndeshjes, por inferioriteti në fushë erdhi pas përjashtimit me karton të kuq të dy futbollistëve, Tito dhe Raul Baena, për të filluar madrilienët goleadën.
Gareth Bale me katër gola, Karim Benzema me tre, Cristiano Ronaldo me dy dhe Danilo me një, kanë viktimizuar skuadrën e Paco Jemez, që as në ëndrrat më të tmerrshme nuk do kishte paramenduar një “masakër” të tillë.
Kjo fitore e Real Madrid, mund të shërbejë për ta shuar zjarrin ndërmjet klubit dhe tifozëve që nuk janë të kënaqur aspak me ecurinë dhe formën që po kalon klubi madrilien. Falë kësaj goleadë, mbretërit afrohen në vetëm dy pikë liderit Barcelona, që ka një ndeshje më pak të zhvilluar, por tani ka stemën e kupës së botës për klube, të cilën e barte Real Madrid, deri para këtij takimi.
/tesheshi.com/
