Një rezulotë e pritshme për Srebrenicën në OKB, për ta shpallur atë genocid serb, vijojnë të mbajë nën ankth Beogradin, pasi pasojat do jenë të rënda për Serbinë në arenën ndërkombëtare. Ndaj dhe Vuçiç e ka kryefjalë të këtoditshme në politikën e tij edhe diplomatike.
Së fundi, ai tha se propozimi për një rezolutë për gjenocidin në Srebrenicë, i cili do të diskutohet në Asamblenë e Përgjithshme të Kombeve të Bashkuara, ishte një ide e Gjermanisë e mbështetur nga anëtarët më të fuqishëm të NATO-s, duke përfshirë SHBA, por se rezultati i votimit nuk do të jetë ai që pret Perëndimi.
“Gjermanët e luajtën atë lojë në Asamblenë e Përgjithshme të Kombeve të Bashkuara, amerikanët iu bashkuan atyre”, tha Vuçiç për TV Pink-un pro-qeveritar.
“Ata presin që blloku perëndimor, me mbështetjen e vendeve islame, të sigurojë një shumicë të sigurt dhe në këtë mënyrë t’i japë një goditje shtesë serbëve dhe Serbisë. Gjermanët nuk e fshehin se është kështu. Por rezistenca ndaj saj po rritet, ata llogaritën se do të kishin të paktën 70 me 90 vota pro, 60 me 70 abstenime dhe 20 me 30 kundër. Por nuk do të ketë një rezultat të tillë”.
Vuçiç tha se Maqedonia e Veriut është një nga bashkësponzoruesit e rezolutës që shpall 11 korrikun si Ditën Ndërkombëtare të Përkujtimit të Gjenocidit të Srebrenicës, “bazuar në radhë të parë në vendimet e lidershipit shqiptar”.
“Por nuk ka rëndësi se vendimi i udhëheqjes së kujt është, bëhet fjalë për Maqedoninë e Veriut, i falënderoj për këtë, mendoj se e merituam me gjithçka që bëmë për miqësinë me Maqedoninë e Veriut”, tha Vuçiç, duke ironizuar e aluduar për një tradhëti të Shkupit zyrtar për këtë rast.
Ai deklaroi se nismëtarët e rezolutës “u përpoqën të gjenin dikë në çdo kontinent” dhe shtoi se ata gjetën Ruandën, Zelandën e Re dhe Kilin, si dhe disa vende “që kanë qenë gjithmonë sponsorë të të gjitha projekteve të tilla si Malajzia dhe Jordania”.
“Pashë edhe Austrinë, ishte një vendim personal i (ministrit të Jashtëm Alexander) Schallenberg. Asgjë e veçantë dhe e papritur, duke pasur parasysh se çfarë do të bënte Shallenberg kundër Serbisë, edhe pse do të thotë se po e bën për të mirën e Serbisë”, tha Vuçiç.
Ai tha se nesër në mëngjes në Beograd do të ketë një bisedë “të rëndësishme dhe të vështirë” me Ndihmës Sekretarin Amerikan të Shtetit për Çështjet Evropiane dhe Euroaziatike, James O’Brien dhe se pasdite do të fluturojë për në New York, ku do të takohet me përfaqësues të më shumë se 120 vendeve.
“Nëse ata kanë më shumë vota për (rezolutën) sesa kundër, që ka të ngjarë, një ditë pas miratimit të saj ne do të ngremë flamujt serb dhe do të ecim rrugëve tona dhe të botës edhe më të fortë, më të vendosur dhe më të vendosur dhe me kokën lart. Vetëm votimi në Asamblenë e Përgjithshme të OKB-së do t’ju tregojë se ku qëndron e vërteta me gjithë presionin e gjermanëve dhe amerikanëve”, tha Vuçiç. /tesheshi.com/
