NATO po mendon të shtojë numrin e trupave që do të dërgojë në veri të Kosovës, për t’i paraprirë një tensioni që mund të provokojë Beogradi në kuadër të zgjedhjeve presidenciale serbe.
Nesër do ta vizitojë Kosovën sekretari i përgjithshëm i NATO-s, Jens Stoltenberg, i cili do të diskutojë me autoritetet e KFOR-it për situatën e kufirit në veri.
Madje, siç mësohet, kreu i Aleancës së Atlantikut të Veriut do të diskutojë edhe për murin në Mitrovicë.
“E ardhmja e gjithë rajonit të Ballkanit Perëndimor shtrihet në familjen euroatlantike. Nuk do të ketë perspektivë reale për një të ardhme më të mirë në Kosovë, as për serbët e as për shqiptarët, pa respektim të plotë të të drejtave të njeriut dhe të të drejtave të të gjitha komuniteteve. KFOR-i do të marrë të gjitha masat që konsiderohen të nevojshme për të mbajtur një ambient të qetë dhe të sigurt në Kosovë gjatë gjithë kohës, në përputhje me mandatin e tij të OKB-së.” tha nga Brukseli një zyrtar i Aleancës Veriatlantike./tesheshi.com/
