Zgjedhjet presidenciale në Mal të Zi po zhvillohen nën një klimë të rëndë tensioni.
Sipas të dhënave të orës 13.00 vetëm 32% e zgjedhësve kishte votuar, ndërkohë partitë e opozitës kanë paraqitur ankesa të shumta në Komisionin Qendror të Zgjedhjeve.
Favorit për t’u zgjedhur president është Milo Gjukanoviç, politikani që ka 27 vjet në pushtet, ndërkohë që rivali kryesor është Mladen Bojaniç, një ekonomist i pavarur por që mbështetet nga partitë filoserbe dhe filoruse.
Bojaniç është kundër hyrjes së Malit të Zi në NATO.
Ndërkaq, një tjetër kandidate është Draginja Vuksanoviç e Partisë Socialdemokrate, deri pak vite më parë aleate në qeveri.
Lëvizja opozitare “URA”, kryetar i së cilës është ulqinaku Dritan Abazoviç akuzoi partinë në pushtet se po blen votuesit.
Në Budva, votimi filloi me 55 minuta vonesë për shkak të problemeve teknike me kamerat.
Kudo në çdo vendvotim ka përplasje të egër ndërmjet komisionerëve të Partisë Demokratike të Socialistëve që drejtohet nga Gjukanoviç dhe komisionerëve të Frontit Demokratik, një duzinë forcash politike që kundërshtojnë anëtarësimin e Malit të Zi në NATO.
Sputik dhe Tanjug botojnë çdo një orë ankesat e partive të opozitës, ndërkohë që OSBE-ODIHR tha se nesër do të japë verdiktin e saj për zgjedhjet presidenciale.
Ka shumë gjasa që Gjukanoviç të dalë fitues që në raundin e parë, por sipas asaj që po shihet opozita nuk do t’i njohë zgjedhjet presidenciale si dhe kreun e ri të shtetit. /tesheshi.com/
