Plot 48 skuadra kanë zbritur mbrëmë në fushë për të luajtur takimet e para të fazës në grupe të Europa League-s.
Një pjesëmarrje e jashtëzakonshme, që ndryshe nga Champions League, e bën mjaft të larmishëm futbollin europian.
Nga gjithë ajo mori ndeshjesh, duhet veçuar pa dyshim goli i Armando Sadikut në përballjen mes Vilarealit dhe Zyrihut. Lojtari i përfaqësueses shqiptare shënoi një gol spektakolar që në minutën e dytë.
Vendasit janë befasuar kur kanë parë atë goditje të fuqishme nga jashtë zonës të Sadikut, që ka përfunduar brenda portës së mbrojtur nga Andres Fernandez.
Vilareali do të fitonte gjithsesi falë golave të Patos dhe Dos Santos-it; një ndeshje e mbyllur 2-1 për spanjollët.
Befasia e parë e mbrëmjes së të enjtes ka qenë humbja e Mançester Junajtedit ndaj Fejënordit në Holandë.
Mourinho kishte lënë në shtëpi Rooney-n, ndërsa do të bënte tetë ndryshime në formacionin e parë.
Holandezët fituan 1-0, me një gol të shënuar nga Vilhena në minutën e 79-të. Për Mourinho-n, çelsi i humbjes për anglezët ishte mungesa e dëshirës për të fituar.
Një tjetër humbje, por dhe më e rëndë e më trishtuese, qe ajo e Interit ndaj izraelitëve të Hapoel Bir Shevas. Fitorja 0-2 e udhëtuesve erdhi pas golave të pjesës së dytë, të realizuar nga Miguel Vitor dhe Buzaglo.
Ndeshja me më shumë gola qe ajo mes Makabit të Tel-Avivit dhe Zenitit. Një përmbysje e çmendur e rusëve, që fituan 3-4 pasi deri në minutën e 70 humbisnin me tre gola diferencë. Kthesa e tyre nis në minutën e 76-të, për të përfunduar në të 91-tën, me katër gola të njëpasnjëshëm.
Sasuolo ka vijuar të bëjë një figurë të mirë, duke fituar këtë herë 3-0 ndaj Atletik Bilbaos.
Çekët e Viktoria Plzenit kanë barazuar 1-1 me Romën; gjatë gjithë lojës është aktivizuar Ergys Kaçe, i ardhur te Viktoria Plzen në formë huazimi.
Holandezët e Ajaksit kanë fituar 1-2 në Athinë ndaj Panathinaikosit, Sauthemptoni e ka mposhtur 3-0 Spartën e Pragës, PAOK – Fiorentina ka përfunduar 0-0, e gjermanët e Shalkes kanë marrë tre pikë në fushën e francezëve të Nisës, në një takim të fituar 0-1. /tesheshi.com/
