Nga Bardha Nergjoni
Banorët e pallateve të ndërtuara për të pastrehët në zonën e Shkozës, aty ku iu dha një strehë dhe të ndjerit Tonin Tërshana, i cili nuk mundi ta gëzojë më shumë se 2 javë për shkak se ndërroi jetë, nuk ankohen vetëm për mungesën e ujit, hapësirave të vogla të banesave, por së fundi kanë hasur edhe një tjetër problem: dëgjojnë gjithçka që bëjnë fqinjët.
Sipas tyre, muret janë shumë të holla dhe duket sikur komshiun e ke në shtëpi e jo pas murit, siç thotë dhe Shyqyriu, një banor që është strehuar nga bashkia në këto pallate.
“Duket e çuditshme por ne nuk jetojmë dot pasi mjafton që fqinji të ketë fëmijë apo edhe të grindet dhe ne dëgjojmë gjithçka. Nuk e dimë se me çfarë materialesh i kanë bërë, por siç dëgjohet këtu nuk besoj se dëgjohet në asnjë shtëpi tjetër. E kuptuam që janë të vogla, po kështu që kemi mungesa, por që të kemi këtë problem tani nuk e mendonim. Ftoj gjithkënd të jetojë një ditë në këto pallate e do më kuptojë”.
Si Shyqyriu janë edhe shumë banorë të tjerë që patën fatin e madh të marrin një strehë tek pallatet e Shkozës të Tiranës. Tashmë, atyre u duhet të përballen me këtë problem që nuk ka një zgjidhje.
Ndërkohë, një tjetër shqetësim që ka lindur në këto pallate është nënstacioni elektrik. Shumë pranë ndërtesave ndodhen shtylla të tensionit të lartë që nga të gjitha studimet shkarkojnë valë të dëmshme. Kush mban përgjegjësi për këtë, pyesin ata anorët të shqetësuar dhe japin sërish vetë përgjigje: askush!
242 familjet që përfituan shtëpi sociale në shtator do të paguajnë një qera mujore modeste, e cila varion nga 4 mijë lekë të rinj në 12 mijë lekë të rinj. Kjo në varësi të metrave katrorë dhe numrit të anëtarëve të çdo familje. Këto shtëpi do të jenë vetëm në përdorim të tyre dhe, në rast të shkeljes së kontratës deri dhe mospagesë të qerasë, apartamenti i jepet një familjeje tjetër.
Për këtë bllok banesash të përfunduar para vitit 2011 kanë aplikuar rreth 2 mijë të pastrehë. Prej vitesh këto apartamente kanë qenë të pabanuara për shkak të bllokimeve politike të këshillit bashkiak te Tiranës dhe përpjekjeve të subjekteve politike në këshill për të ndryshuar listën emërore të të pastrehëve. Lista përfundimtare e familjeve të pastreha u miratua pa ndryshime në mbledhjen e parë të këshillit bashkiak pas mandatimit të Erjon Veliajt në krye të Bashkisë së Tiranës.
Por tashmë që këto pallate u banuan, problemet për familjet e strehuara duket se s’kanë të mbaruar dhe aq më tepër nuk kanë zgjidhje.
