Juventusi doli i fituar nga takimi i parë gjysmëfinal i Kupës së Italisë ndaj Napolit. Dy 11-metërshat e kthyer në gol nga Dybala qenë çelësi në fitoren 3-1.
Po këto 11-metërsha janë bërë shkas që te Napoli të shpërthejnë në akuza ndaj gjykimit të ndeshjes, duke e cilësuar atë të turpshëm.
“Mendojmë se është e rëndësishme t’i falënderojmë publikisht djemtë për paraqitjen e tyre dhe të themi se dolëm të mundur nga dy vendime që nuk ishin të diskutueshme, por të turpshme dhe dëmtuese për të gjithë futbollin italian,” deklaroi për Rai Sport një nga drejtuesit kryesorë të klubit napolitan, Cristiano Giuntoli.
“Vendimet ishin të turpshme,” nënvizoi rishtas ai, duke e shprehur hapur kundërshtinë ndaj gjykimit.
Veç tij ka folur dhe Pepe Reina, portieri spanjoll i Napolit, që gjithashtu është treguar i ashpër ndaj arbitrimit të ndeshjes.
“Rezultati ndryshoi për shkak të vendimeve të arbitrit. Kjo është e tëra!”
Skuadra napolitane do të kalonte e para në epërsi në pjesën e parë me anë të Callejon-it. Pjesa e dytë në Torino do të ishte e tëra në favor të vendasve, që barazuan me 11-metërshin e kthyer në gol nga Dybala në nisje të saj, kaluan në avantazh më pas me golin e Higuain-it, dhe i thelluan shifrat po me një penallti të ekzekutuar nga Dybala.
Gjysmëfinalja tjetër, e cila luhet sonte, vë përballë Lacion dhe Romën, në derbin e kryeqytetit italian. Ndeshjet e kthimit do të zhvillohen më 5 prill. /tesheshi.com/
