Shefi i Mercedes-it, Toto Wolff, u shfaq tejet i acaruar të dielën e shkuar, pasi dy pilotët e skuadrës së tij ishin përplasur dhe një herë tjetër. Një përplasje që do të shkonte në favor të Hamilton-it, i cili do të fitonte garën e Austrisë, kurse Rosberg do të humbte pikë të çmueshme me atë vend të katërt gjithsesi ngushëllues.
Pas një takimi mes drejtuesve të klubit dhe pilotëve është vendosur që këta të fundit të lihen të garojnë lirisht, por ata janë paralajmëruar njëkohësisht nëse do të ketë një ngjarje të ngjashme me atë të së dielës.
Nuk do të ketë urdhra skuadre për Rosberg-un e Hamilton-in, por ato do të imponohen vetëm nëse nuk do të respektohen rregullat e rishikuara të angazhimit.
Incidenti në Austri ishte i dyti në pesë gara, duke pasuar atë të xhiros së parë në Çmimin e Madh të Spanjës. Toto Wolff është i vendosur të mos lejojë më një përplasje mes dy pretendentëve për titullin kampion.
Nuk ka ende një specifikim të penaliteteve në rast të një përplasjeje, por veç gjobës, mund të jetë dhe pezullimi nga një garë sezonale.
Rosberg e kryeson ende kampionatin, me 11 pikë më tepër se britaniku. Hamilton i ka dhënë provat se nuk e duron aspak faktin që gjermani të vijojë të kryesojë.
Gara e kësaj fundjave është e dhjeta, e do të zhvillohet në Silverstone, ku pritet një tjetër pilotim i nxehtë nga të dy pilotët. /tesheshi.com/
