Sekretari i përgjithshëm i Lëvizjes për Reforma (Aleanca për Shqiptarët), Arben Taravari, në një deklaratë për Radion Evropa e Lirë thotë se pasi presidenti i shtetit nuk po e dorëzon mandatin, pret nga Lidhja Social-Demokrate e Maqedonisë të marrë guximin që me mbështetjen e nënshkrimeve nga 20 deputetët shqiptarë të thirret seanca parlamentare dhe të zgjidhet kryetari i ri parlamentit.
“Tani presim që Zaev i cili ka më tepër deputetë se gjitha partitë shqiptare të ndërmarrë hapa konkretë drejt konstituimit të parlamentit. Në politikë kërkohet guxim dhe ai duhet të tregohet i guximshëm në këtë moment nëse presidenti Ivanov nuk e ndan mandatin, 20 deputetë mund të marrin iniciativë për mbledhjen e kuvendit ose ta detyrojnë drejtuesin e mbledhjes konstituive të thërrasë mbledhje për përzgjedhjen e kryetarit të ri të parlamentit”.
Ai shtoi se si LR-PDSH, qëndrojnë pas kërkesave të tyre që një nga tre postet kyçe të shtetit, presidenti, kryetari i parlamentit dhe Qeverisë, duhet t`iu takojë shqiptarëve. /tesheshi.com/
