Zgjedhja e Talat Xhaferit si kryeministër i një qeverie teknike në Maqedoni, ka çuar kryeministrin Rama drejt një vlerësimi për Ali Ahmetin, siç thotë ai, paçka kritikave për të në politikën e brendshme.
“Ali Ahmetit mund t’i bëhen kritika plot brenda vendit, sepse është e drejta dhe detyra e kujtdo që është në opozitë të kërkojë më shumë nga kushdo që është në pushtet… Por çka ka bërë Ali Ahmeti me pushtetin për përparimin e të drejtave të shqiptarëve në shtetin fqinj, e për afirmimin e tyre si qytetarë të barabartë të Republikës së Maqedonisë së Veriut është një leksion historik për të gjithë ne dhe brezat që vijnë! E duke parë foton bashkëngjitur të një tjetër arritjeje historike të lidershipit të Ali Ahmetit, m’u kujtua fjala e mençur e një politikani të madh, ‘Djemtë e duan pushtetin për t’u njohur nga të tjerët, kurse burrat për të bërë për të tjerët’; kjo do të ishte diçiturë perfekte për këtë foto”, shkruan Rama.
Kujtojmë se Talat Xhaferi ishte deri dje i pari shqiptar në krye të Kuvendit maqedonas, e tashmë vjen radha të jetë kryeministër, ndonëse i një kabineti 100 ditësh.
Ai vjen nga radhët e BDI-së, një forcë e dalë nga lufta e 2001-shit, ku Ali Ahmeti ishte udhëheqës i saj e Talat Xhaferi pas tij në hije si ushtarak profesionist, dalë nga shkollat e ish-Jugosllavisë. /tesheshi.com/
