Ka përfunduar pa asnjë marrëveshje për zgjedhjet e pjesshme lokale në Dibër takimi ndërmjet Edi Ramës dhe Ilir Metës, që vetëm për vetëm nuk kanë biseduar prej një muaji.
Është mbledhur tek vila e Mehmet Shehut, i ashtuquajturi takim koordinues PS-LSI, ku përveç Kryeministrit dhe Kreut të Kuvendit, kanë marrë pjesë edhe krerët e grupeve parlamentare: Gramoz Ruçi dhe Petrit Vasili.
Ka rënë në sy mungesa e ministrit të Brendshëm, Saimir Tahiri, i cili është pjesë e tryezës së koalicionit, por që pas një përplasje të hapur me Ilir Metën për rastin e Klemend Balilit, ka shmangur përballjen me kreun e LSI-së.
Ndërkaq, në takim nuk ka qenë prezent as ministri i Drejtësisë, Ylli Majnjani, i cili paditi Tahirin në Prokurori për të ashtuquajturën “aferë të përgjimeve”.
Burime brenda mazhrancës bënë të ditur se palët nuk kanë rënë dakord për çështjen e Peshkopisë, nëse mazhoranca do të jetë unike për një kandidat në zgjedhjet e pjesshme në Peshkopi.
Madje siç mësohet, LSI i konsideron manovrat e shpejta të PS-së për të riorganizuar PS-në në Dibër, si lëvizje të njëanshme.
Situata në Peshkopi po mbahet pezull për shkak të mos dekretimit ende nga Presidentit të Republikës së shkarkimit të ish-kryebashkiakut Shukri Xhelili.
Dekretimi i kreut të shtetit shqiptar është i domosdoshëm për të shpallur ditën e zgjedhjeve dhe më pas KQZ-ja t’i hapë rrugë procesit.
Ndërkaq, kreu i grupit parlamentar të PS-së, Gramoz Ruçi, por edhe kolegu i tij i LSI-së, Petrit Vasili, thanë që kanë folur vetëm për çështjen e reformës në drejtësi./tesheshi.com/
