Pak minuta pas përfundimit të konferencës së përbashkët Rama-Merkel ka ardhur edhe reagimi i kryetari të opozitës, Lulzim Basha, në një njoftim për mediat. Dukshëm, e ka dëgjuar me vëmendje fjalimin dy-palësh, e sidomos porositë e kancelares, drejtuar klasës politike shqiptare, për zbatimin e 5 “detyrave të shtëpisë”, e veçanërisht atë të Reformës në Drejtësi.
Po ashtu, ai duket se ka ndryshuar qëndrim në krahasim me deklaratat e pak ditëve më parë, pas mesazhit të deputetit gjerman, Gunther Krichbaum se Bundestagu nuk do të votojë pro hapjes së negociatave para tetorit të vitit 2018. Basha njofton publikisht se Partia Demokratike është e gatshme të bashkëpunojë për zbatimin e kësaj pike, si dhe për garantimin e zgjedhjeve të lira e të ndershme, pasi vlerëson mbështetjen e Gjermanisë në këtë proçes.
“Shqipëria është me fat që ka mbështetjen e Gjermanisë në përpjekjet e saj për përparim dhe integrim europian. Ne i jemi veçanërisht mirënjohës Kancelares Merkel për mirëkuptimin dhe mbështetjen e saj të vazhdueshme ndaj Shqipërisë. Dua ta siguroj Kancelaren dhe popullin gjerman se shqiptarët janë të vendosur të përqafojnë të gjitha vlerat europiane dhe të ndërtojnë një shoqëri të denjë për të gjithë, duke luftuar krimin, drogën, korrupsionin dhe duke e çliruar politikën prej tyre. Partia Demokratike dhe unë do të marrim përgjegjësinë tonë në gjendjen ku ndodhet vendi, veçanërisht për te siguruar zgjedhje te lira dhe te ndershme dhe zbatimin sa më parë të reformës në drejtësi”, përfundon Basha.
Gjatë kësaj kohe, lideri i PD-së ka akuzuar vazhdimisht kryeministrin dhe kabinetin e tij qeverisës se proçesin i integrimit po e pengon droga e korrupsioni, pas së cilave sipas Bashës fshihet vetë Rama dhe klientët e tij. /tesheshi.com/
