NATO i dha mbështetje të fortë Turqisë pas takimit urgjent të thirrur nga Ankaraja e ku u diskutua situata më e fundit pas sulmeve në Suruc. Në një konferencë shtypi, pas takimit, sekretari i Përgjithshëm i Aleancës, Jens Stoltenberg theksoi se “kishte një marrëveshje të plotë dhe të gjithë aleatët shprehën mbështetjen e tyre të fuqishme për Turqinë. “Ne qëndrojmë të bashkuar me Turqinë”, theksoi ai.
Shefi i NATO-s theksoi se të gjithë aleatët dënojnë terrorizmin në të gjitha format e tij. Në deklaratën e lëshuar pas takimit në Bruksel, Këshilli Veriatlantik njofton se diskutoi kërcënimet kundër Turqisë dhe ngushëlloi familjet e 32 personave të vrarë në sulmin e javës së kaluar në qytetin Suruc, sikundër edhe ato të policëve e pjesëtarëve të Ushtrisë të vrarë pas episodit të 20 Korrikut”.
“Terrorizmi përbën një kërcënim direkt për sigurinë e vendeve të NATO-s dhe stabilitetin e prosperitetin ndërkombëtar”, thuhet në njoftim
“Terrorizmi në të gjitha format dhe shfaqjet e tij nuk duhet kurrë të tolerohet apo justifikohet. Siguria e Aleancës është e pandashme dhe ne jemi solidarë me Turqinë”, thuhet në deklaratën e NATO-s./tesheshi/
