Presidenti amerikan Joe Biden tha se në takim me Princin e Kurorës saudite Mohammed bin Salman ngriti çështjen e vrasjes së gazetarit Jamal Khashoggi, sipas një informacioni të konfirmuar nga Ministria e Jashtme saudite.
“I thashë Mohammed bin Salmanit se besoja se ai ishte personalisht përgjegjës për vrasjen e Khashoggi”, tha Biden pas bisedimeve në Jeddah me Princin e Kurorës, të cilin e quajti “vrasës” për këtë rast. Ky i fundit u përgjigj se nuk ishte personalisht përgjegjës për vrasjen e gazetarit. Kështu, Biden “lëpiu atë që pështyu” me diplomaci.
Presidenti amerikan shtoi se me bashkëbiseduesin e tij ka ngritur edhe çështjen e të drejtave të njeriut dhe nevojën për reforma politike. “E bëra të qartë se çështja është me rëndësi jetike për mua dhe për Shtetet e Bashkuara”, u tha ai gazetarëve në një konferencë shtypi.
Disa minuta më parë, e fejuara e Khashoggit, Hatiche Cengiz, u ankua në Tëitter se Biden i ka njollosur duart me “gjakun e viktimës së radhës” të Princit saudit.
Duke imagjinuar se çfarë do të kishte shkruar partneri i saj, Cengiz iu drejtua Bidenit me postimin e mëposhtëm: “Kështu i trajtoni përgjegjësit për vrasjen? Gjaku i viktimës së radhës të MBS-së (inicialet e Mohammed bin Salman) është në duart tuaja”.
Nga ana tjetër, Biden përshëndet rritjen e prodhimit të naftës nga Arabia Saudite
Shtetet e Bashkuara dhe Arabia Saudite kanë arritur një sërë marrëveshjesh, nga tërheqja e paqeruajtjes nga një ishull strategjik i rëndësishëm i Detit të Kuq midis Egjiptit dhe Arabisë Saudite, deri te bashkëpunimi për çështjet që lidhen me teknologjinë e telefonisë celulare.
Në deklaratën e lëshuar pasi presidenti amerikan Joe Biden zhvilloi bisedime me zyrtarë të lartë sauditë, duke përfshirë Princin e Kurorës Mohammed bin Salman, Uashingtoni gjithashtu përshëndeti rritjen e prodhimit të naftës tashmë të njoftuar nga OPEC +. Si Arabia Saudite ashtu edhe Rusia janë anëtarë të kësaj organizate.
Sipas deklaratës, paqeruajtësit amerikanë dhe të tjerë do të tërhiqen nga ishulli i Tiranit, ku janë vendosur sipas marrëveshjeve të paqes midis Izraelit dhe Egjiptit të vitit 1978. Tirani ndodhet në një zonë strategjike, që të çon në portin izraelit Eilat.
SHBA mirëpriti gjithashtu vendimin e Riadit për të hapur hapësirën ajrore saudite për transportuesit izraelitë.
Të dy vendet ranë dakord të bashkëpunojnë për sigurinë kibernetike dhe teknologjitë 5G dhe 6G. /tesheshi.com/
