As sot, ministri i Rendit, Saimir Tahiri nuk i ka kursyer sulmet ndaj gjygjtarit Arjan Alija, sidomos pas vendimit të këtij të fundit për të lënë në “arrest shtëpie” drejtorin e Forcave Operacionale të Policisë së Shtetit, Artjon Duka, dhe specialistin Entiol Xhelilaj.
Në një konferencë për shtyp, Tahiri i ka cilësuar argumentet e gjyqtarit si qesharake, ndërsa vendimin “qokë politike”.
“Gjyqtari Aliaj ka vendosur arrest shtëpie për Dukën me argumente skandaloze që nuk janë të denja as për një student juridiku. Për oficerin Duka thuhet se ka hartuar programin e trajnimit dhe ia ka paraqitur eprorit të tij mes të tjerash, ndërsa për Xhelilajn thuhet se ka hyrë në marrëdhënie me palën italiane të trajnimit me qejfin e tij dhe pa urdhrin e askujt”, tha ministri Tahiri. “As në kohën e komunizmit, gjyqtarët nuk kanë qenë kaq ushtarë të bindur të pushtetit të asaj kohe. Flasim këtu për një gjyqtar që ka liruar vrasës dhe përdhunues, ndërsa sot ka marrë një vendim për t’i lënë në arrest shtëpie dy oficerë të Policisë së Shtetit, thjesht dhe vetëm për të bërë qokën e radhës ndaj politikës. Me të vetmin synim për t’u zënë sytë shqiptarëve nga rruga që kemi përpara drejt miratimit të Reformës në Drejtësi. Këta gjyqtarë janë të paarsimuar dhe të kapur peng nga sistemi politik që i ka mbrojtur kur kanë liruar vrasës dhe përdhunues, ndërsa sot përbëjnë provën më të qartë të etheve që kanë zënë drejtësinë përpara miratimit të reformës”, tha ministri Tahiri. /tesheshi.com/
