Risi e seancës së sotme në parlamentin shqiptar, ishte rikthimi i Saimir Tahirit në sallë pas javësh, madje dhe muajsh mungese.
Por kjo ka irrituar opozitën, e cila nën udhëheqjen e Berishës, edhe pse thjesht deputet por me tagrin e një “lideri të përjetshëm”, e ka braktisur sallën.
Berisha kërkoi, kuptohet politikisht e jo konstitucionalisht, që Tahiri të nxirret jashtë, por në pamundësi la vetë sallën së bashku me shpurën e deputetëve të opozitës
“Të nxirret jashtë Saimir Tahiri se po kremtoni raportin me njeriun më kryesor të drogës në Ballkan bashkë me Edi Ramën. Nxirreni jashtë, mos festoni me të”, tha ashpërsisht Berisha, i cili në një moment nisi të xhironte nga afër me celular, deputetin Tahiri.
Ky i fundit mandatin e ushtron si i pavarur, pasi është përjashtuar nga grupi i PS-së me nisjen e procedimin penal.
Në hyrje të Kuvendit, interesit gazetaresk iu përgjigj duke thënë se “nuk ka asnjë frikë nga hetimet”. /tesheshi.com/
