Ish-ministri Tahiri u shfaq sërish në publik, i thirrur nga SPAK, ku qëndroi rreth dy orë. Pasi doli prej aty, njeriu që gjithnjë ka qenë i prirur për deklarime te media, kësaj here qëndroi gojëkyçur.
“Nuk kam asgjë për të thënë”, tha ai pasi doli prej aty ku s’do donte të shkonte kurrë më.
Burime i thanë se Tahiri është thirrur për të dhënë sqarime si person ndaj të cilit kryhen hetime rreth pasurisë por jo vetëm.
Më herët, në kuadër të ketij hetimi SPAK, ka pyetur edhe disa biznesmenë me të cilet familjarët e ish ministrit Tahiri kanë patur transaksione financiare.
Është prokurori Elvin Gokaj që prej muajsh heton Tahirin mbi pasurinë dhe burimin e krijimit të tyre, pas denoncime që kanë mbërritur në SPAK në lidhje me disa prona që janë blerë nga familjarët e tij.
Procedimi në fjalë është regjistruar disa muaj më parë teksa hetuesit kanë nisur verifikimet duke vënë në sitë të gjitha pasuritë e luajtshme, të paluajtshme dhe llogaritë bankare të Tahirit dhe familjarëve të tij.
Saimir Tahiri, ky ish-emër i fuqishëm i qeverisë, perënduar nga akuzat dhe përfunduar në burg, ku bëri 16 muaj në qeli, për të shkuar më pas në shtëpi nga gjykimi i shkurtuar, ka mbetur tashmë vetëm një kujtim i qeverisjes së parë Rama. /tesheshi.com/
