Ish-ministri i Brendshëm, Saimir Tahiri, sot deputet i PS-së, ka depozituar në Kuvend dy nisma të tij, të konkretizuara në projektligje, gjatë kohës kur ishte pjesë e qeverisë, por të cilat nuk janë miratuar.
Nismat kanë të bëjnë me ashpërsimin e dënimit për kultivuesit e bimëve narkotike dhe trafikantëve, si dhe për dhunuesit e kafshëve.
Tahiri tha për mediat se një person që kapet me 1 gram drogë nuk mund të marrë të njëjtin dënim si ai që që kultivon drogë me tonelata.
“I kam rikujtuar Parlamentit ndryshimet në Kodin Penal për kultivmimin e trafikimin e drogës. Shqipëria është vendi i vetëm ku dënohet njëlloj ai që kapet me 1 gram dhe ai që kapet duke trafikuar tonelata hashash, si ai që kultuvon 10 rrënjë hashash si ai tjetri që kultivon hektarë të tëra. Kjo ka shërbyer si një mënyrë për të pasur më shumë pasdrejtësi dhe korrupsion në gjykata, duke lëshuar nga duart ata që kanë mundësi të korruptojnë gjykatën. Parlamenti të dalë nga heshtja pas më shumë se 1 vit dhe t’i marrë në shqyrtim pa pritur më shumë kohë. S’na falet si shoqëri të ketë një drejtësi ndryshe për ata që s’kanë mundësi dhe ndryshe për ata që arrijnë ta korruptojnë”, tha Tahiri.
Në projektligj propozohet që konsumi dhe mbajtja për përdorim vetjak e një sasie të kufizuar lënde narkotike të konsiderohet shkelje administrative dhe jo penale, duke u bazuar edhe në praktikën e shumë vendeve europiane.
Ndërkohë, referuar dhunës ndaj kafshëve, Tahiri tha se ky projektligj duhet të kalojë për të ndalur që më tej këta persona të bëhen edhe më problematikë, duke dhunuar më tej edhe familjarët e duke u kthyer kështu në rrezik për shoqërinë. /tesheshi.com/
