Politikanët kryesorë, diplomatët dhe ekspertët e sigurisë po takohen sot në Konferencën e Sigurisë në Mynih (MSC) mes ngjarjeve tronditëse të shkaktuara nga ndryshimet dramatike në politikën e SHBA-së në lidhje me konfliktin e Ukrainës dhe në Lindjen e Mesme.
Një fjalim i zëvendëspresidentit amerikan, JD Vance pritet të jetë një nga më të ndjekurit në mbledhjen treditore. Në konferencë do të marrë pjesë edhe presidenti ukrainas Volodymyr Zelensky.
Kancelari gjerman Olaf Scholz, një nga 60 liderët në konferencë, tha dje se bisedimet e paqes midis SHBA-së dhe Rusisë, nuk duhet të ndodhnin pa përfshirjen e ukrainasve dhe liderëve evropianë.
Deklarata e tij erdhi pas bisedës telefonike të presidentit amerikan Donald Trump me homologun e tij rus, Vladimir Putin.
Më shumë se 100 ministra janë gjithashtu në listën e të ftuarve në MSC, i cili konsiderohet si një nga forumet më të rëndësishme të politikave të sigurisë në botë.
Presidenti gjerman Frank-Walter Steinmeier do të hapë takimin në orët e para të pasdites dhe presidentja e Komisionit Evropian, Ursula von der Leyen gjithashtu do të mbajë një fjalim.
Përveç Ukrainës, temat kryesore në axhendë përfshijnë situatën në Izrael dhe territoret palestineze – ku Trump ka propozuar zhvendosjen e të gjithë banorëve të Gazës dhe lejimin e SHBA-së për të marrë kontrollin e Rripit të Gazës – si dhe në Siri, ku grupet rebele islamike erdhën së fundmi në pushtet.
Grupe të shumta diskutimi do të marrin në konsideratë gjithashtu sistemet financiare globale, qëndrueshmërinë e demokracive, ndryshimet klimatike, sigurinë bërthamore dhe të ardhmen e inteligjencës artificiale. /atsh/
