Komisioni Europian ka kundërshtuar insinuatat e medias serbe, sipas të cilave shefja e diplomacisë së BE-së, Federica Mogerini është përplasur me kryeministrin e Kosovës, Ramush Haradinaj. Ka qenë gazeta më e madhe serbe Blic, që shkroi se Mogerini është irrituar me Ramushin, pasi ky i fundit ka kërkuar që edhe SHBA të hyjë si palë në dialogun Prishtinë-Beograd.
Sipas Blic, Moghrini ka lënë takimin në mes dhe është larguar para kohe duke mos i dhënë as dorën kryeministrit të Kosovës. Ndërsa Komisioni Europian i ka cilësuar të gjitha këto si “fake news”.
Në një deklaratë për mediat, zëdhënësja e shefes së diplomacisë së BE-së, Maja Kocijançiç, ka deklaruar se “zonja Mogherini ka qenë në takim gjatë gjithë kohës dhe nuk e ka lënë për asnjë minutë sallën”.
Ndërkaq, në lidhje me anulimin e konferencës për shtyp që ishte planifikuar ndërmjet Mogerinit dhe Haradinajt, zyrtarisht u tha se ishte për shkak të “axhendës së ngjeshur”.
Ndërkaq, Tanjug, duke cituar korrespondentët e medias kosovare në takim, thekson se ata e cilësuan si një “atmosferë të rëndë”. /tesheshi.com/
