Një person i panjohur ka qëlluar me gur dritaren e shtëpisë së Nadezda Cvetniç, nënës së gruas së parë të Oliver Ivanoviçit, politikanit serb të Kosovës i vrarë së fundmi, në Mitrovicë.
Sipas TV Most, vajza e Cvetniçit, Marina Ivanoviç, konfirmoi se incidenti ndodhi pak pas mesnatës, shkruan Kallxo.com.
Marina tha se nëna dhe vëllai i saj, të cilët ishin brenda në shtëpi në atë kohë, ishin trembur dhe nuk e dinë se cila mund të ketë qenë arsyeja e sulmit.
Oliver Ivanoviç, kreu i partisë Liri, Demokraci dhe Drejtësi, u qëllua para zyrës së tij më 16 janar dhe vdiq më pas në spital.
Vrasja e tij është dënuar gjerësisht nga zyrtarët e BE-së, ata serbë dhe kosovarë.
Ai shihej një politikan i moderuar në Kosovë që përkrahte bashkëjetesën midis pakicës serbe dhe shumicës shqiptare.
Megjithatë, ai po rigjykohej për urdhërimin e vrasjes së shqiptarëve të Kosovës në vitin 1999, gjatë luftës së Kosovës për pavarësi. Ai e deklaroi veten të pafajshëm. /tesheshi.com/
